شکست کے بعد پنرائی وجین کی قیادت پر سوالات، سی پی آئی ایم میں مستقبل کو لے کر غور و خوض تیز

پنرائی وجین نے 1996 میں ای کے نینار حکومت میں بجلی کے وزیر کے طور پر اہم سیاسی سفر کا آغاز کیا تھا۔ اس کے بعد 1998 میں وہ سی پی آئی ایم کے کیرالہ ریاستی سکریٹری بنے اور آہستہ آہستہ پارٹی تنظیم پر اپنی مضبوط گرفت قائم کر لی۔ تقریباً دو دہائیوں تک پارٹی کے بیشتر اہم فیصلے ان کی منظوری کے بغیر نہیں ہوتے تھے اور اختلاف رائے رکھنے والے لیڈروں کو اکثر حاشیے پر دھکیل دیا جاتا تھا۔

2016 میں جب وہ کیرالہ کے وزیر اعلیٰ بنے تو ان کی سیاسی طاقت مزید بڑھ گئی۔ انہوں نے نہ صرف حکومت بلکہ پارٹی پر بھی غیر معمولی اثر و رسوخ قائم رکھا۔ ان کے دور حکومت میں انتظامیہ اور پارٹی دونوں میں فیصلہ سازی کا مرکز تقریباً مکمل طور پر ان کی ذات بن گئی تھی۔ وزرا، افسران اور پارٹی قائدین ایک ایسی مرکزی قیادت کے تحت کام کر رہے تھے جہاں آخری فیصلہ پنرائی وجین ہی کا مانا جاتا تھا۔