وزیر اعظم مودی کی 24 گھنٹے میں دوسری بار اپیل، سونا نہ خریدنے اور ورک فرام ہوم پر زور؛ پون کھیڑا کی سخت تنقید

نئی دہلی: مغربی ایشیا میں ایران اور امریکہ کے درمیان بڑھتی کشیدگی کے عالمی معیشت پر ممکنہ اثرات کے بیچ وزیر اعظم نریندر مودی نے 24 گھنٹے کے اندر دوسری مرتبہ عوام سے احتیاط، بچت اور روزمرہ زندگی میں تبدیلیاں لانے کی اپیل کی ہے۔ گجرات کے وڈودرا میں سردار دھام ہاسٹل کے افتتاح کے موقع پر خطاب کرتے ہوئے وزیر اعظم نے کہا کہ موجودہ عالمی حالات کو دیکھتے ہوئے ملک کے عوام کو ایندھن کی بچت، غیر ضروری اخراجات میں کمی اور دیسی وسائل کے استعمال پر توجہ دینی چاہیے۔

وزیر اعظم نریندر مودی نے اپنے خطاب میں خاص طور پر سونا خریدنے سے گریز کرنے کی اپیل کی۔ انہوں نے کہا کہ عالمی غیر یقینی صورتحال کے دوران لوگوں کو غیر ضروری خریداری مؤخر کرنی چاہیے تاکہ معاشی دباؤ کم رہے۔ ان کا یہ بیان سوشل میڈیا اور سیاسی حلقوں میں تیزی سے زیر بحث آ گیا، کیونکہ گزشتہ 24 گھنٹوں کے دوران یہ دوسری بار تھا جب وزیر اعظم نے عوام سے احتیاطی اقدامات اپنانے کی بات کی۔