دوسرے مرحلے میں شام پانچ بجے تک تقریباً 90 فیصد ووٹنگ، عوامی جوش عروج پر

دن بھر مختلف پولنگ مراکز پر ووٹروں کی طویل قطاریں دیکھی گئیں۔ صبح کے اوقات میں ووٹنگ کی رفتار نسبتاً معتدل رہی، تاہم دوپہر کے بعد اس میں نمایاں تیزی آئی۔ سرکاری اعداد و شمار کے مطابق دوپہر ایک بجے تک پہلے چھ گھنٹوں میں 61.11 فیصد ووٹنگ درج کی گئی تھی، جو تین بجے تک بڑھ کر 78.68 فیصد تک پہنچ گئی۔ اس کے بعد بھی ووٹروں کی آمد کا سلسلہ جاری رہا، جس کی وجہ سے شام تک ووٹنگ کی شرح تقریباً 90 فیصد کے قریب پہنچ گئی۔

اضلاع کے لحاظ سے جائزہ لیا جائے تو کئی علاقوں میں 90 فیصد سے زائد ووٹنگ درج کی گئی، جو ایک قابل ذکر پیش رفت سمجھی جا رہی ہے۔ پورب بردھمان میں سب سے زیادہ 92.46 فیصد ووٹنگ ہوئی، جبکہ ہوگلی میں 90.34 فیصد اور نادیا میں 90.28 فیصد ووٹنگ ریکارڈ کی گئی۔ دیگر اضلاع میں بھی ووٹروں کی شرکت متاثر کن رہی اور مجموعی رجحان مثبت نظر آیا۔