ایسٹرانومر کمپنی کے سی ای او اینڈی بائرن نے استعفیٰ دیا

اے آئی کمپنی ایسٹرانومر کے سی ای او اینڈی بائرن  نے استعفیٰ دے دیا ہے۔ یہ فیصلہ اس وائرل ویڈیو کے چند دن بعد سامنے آیا ہے جس میں ان کو  اور کمپنی کے ایچ آر چیف کرسٹن کیبوٹ کو بوسٹن کے قریب کولڈ پلے کنسرٹ کے دوران اسٹیڈیم میں ایک ساتھ دیکھا گیا تھا۔

ویڈیو میں دونوں کو ایک دوسرے کو گلے لگاتے اور کیمرے سے بچنے کی کوشش کرتے ہوئے دیکھا گیا جس کے باعث سوشل میڈیا پر ان کے افیئر کی قیاس آرائیاں شروع ہوگئیں۔ کولڈ پلے کے مرکزی گلوکار کرس مارٹن نے اسٹیج سے کہا، ‘یا تو ان دونوں کا افیئر ہے یا وہ بہت شرمیلی ہیں۔’ اس کے بعد یہ واقعہ انٹرنیٹ پر وائرل ہوگیا۔

ایسٹرانومر کمپنی نے ہفتے کے روز ایک بیان جاری کرتے ہوئے بائرن کے استعفیٰ کی تصدیق کی۔ کمپنی نے کہا، ‘ہمارے لیڈروں سے توقع کی جاتی ہے کہ وہ اچھا برتاؤ کریں اور اپنی ذمہ داریاں پوری کریں۔ حال ہی میں یہ معیار پورا نہیں ہوا۔ اینڈی بائرن  نے استعفیٰ دے دیا ہے جسے بورڈ آف ڈائریکٹرز نے قبول کر لیا ہے۔’

ہفتے کے شروع میں، کمپنی نے بائرن  کو چھٹی پر بھیج دیا اور ایک عبوری سی ای او مقرر کیا گیا۔ کمپنی نے یہ بھی واضح کیا کہ وائرل ویڈیو میں نظر آنے والی خاتون ایلیسا سٹوڈارڈ نہیں ہیں، جو کمپنی کی ہیومن ریسورسز کی نائب صدر ہیں، بلکہ وہ کرسٹن کیبوٹ، چیف پیپلز آفیسر ہیں۔ کمپنی نے کہا کہ وہ اپنی اقدار کے لیے پرعزم ہے اور واقعے کی اندرونی تحقیقات شروع کر دی گئی ہیں۔