’دعویٰ وشوگرو کا، لیکن ایک بھی امتحان ڈھنگ سے نہیں کرا سکتے‘، راہل گاندھی کا پی ایم مودی پر طنز

لوک سبھا میں حزب اختلاف کے قائد اور کانگریس رکن پارلیمنٹ راہل گاندھی نے وزیر اعظم نریندر مودی پر ملک کے تعلیمی نظام کو پوری طرح برباد کرنے کا سنگین الزام عائد کیا۔ انھوں نے ہفتہ کے روز سوشل میڈیا پلیٹ فارم ’ایکس‘ پر جاری ایک پوسٹ میں کہا کہ وشو گرو بننے کے بڑے بڑے دعوے کرنے والی حکومت ایک بھی امتحان ٹھیک سے منعقد کرانے میں کامیاب نہیں ہے۔

راہل گاندھی کا یہ تبصرہ ایسے وقت میں آیا ہے جب نیشنل ٹیسٹنگ ایجنسی (این ٹی اے) نے بتایا کہ ہفتہ کے روز ملک بھر کے گریجویٹ ڈگری پروگراموں میں داخلہ کے لیے منعقد سی یو ای ٹی-یو جی 2026 کا امتحان کچھ مراکز پر تکنیکی خامی کے سبب تاخیر سے شروع ہوا۔ اس تعلق سے کانگریس رکن پارلیمنٹ نے ’ایکس‘ پر لکھا ہے کہ ’’نیٹ، سی بی ایس ای، ایس ایس سی، اور آج سی یو ای ٹی۔ 4 امتحانات۔ ایک کروڑ بچے۔ ایک بھی ایمانداری سے نہیں ہو پایا۔‘‘

راہل گاندھی نے اس معاملہ میں پی ایم مودی کو ہدف تنقید بناتے ہوئے لکھا ہے کہ ’’دعوے وشوگرو کے، لیکن ملک میں ایک امتحان ڈھنگ سے نہیں کروا سکتے۔ مودی جی نے پورے امتحان نظام کو تباہ کر دیا ہے۔‘‘ ساتھ ہی وہ پی ایم مودی کو مخاطب کرتے ہوئے لکھتے ہیں کہ ’’جس نسل کا مستقبل آپ برباد کر رہے ہیں، وہ نسل آپ کا حساب کرے گی۔‘‘

’سی یو ای ٹی-یو جی 2026‘ کے امتحان میں تکنیکی خامی کی خبر عام ہونے کے بعد کانگریس نے بھی اپنے ’ایکس‘ ہینڈل سے مودی حکومت کو تنقید کا نشانہ بنایا ہے۔ کانگریس نے پریشان حال طلبا اور سرپرستوں کی ویڈیو شیئر کرتے ہوئے لکھا ہے کہ ’’پہلے نیٹ پیپر لیک، پھر سی بی ایس ای میں گڑبڑی، اب سی یو ای ٹی امتحان میں خامی۔ اب صاف ہو گیا ہے کہ بغیر دھاندلی اور بدانتظامی کے امتحان کروانا مودی حکومت کے بس کی بات نہیں ہے۔‘‘ تلخ تیور اختیار کرتے ہوئے کانگریس نے یہ بھی لکھا ہے کہ ’’یہ نریندر مودی اور دھرمیندر پردھان کی ناکامی ہے، جس کا خمیازہ بچے اور ان کے والدین بھگت رہے ہیں۔ مودی حکومت میں پورا سسٹم فیل ہو گیا ہے۔‘‘