اب ٹیلی ویژن پر قسمت آزمائی کریں گے روہت شرما، نئے پروگرام کا ٹیزر ہوا ریلیز

ہندوستانی کرکٹ ٹیم کے شاندار بلے باز اور یک روز ٹیم کے کپتان روہت شرما کا ہر انداز اُن کے مداحوں کو پسند آتا ہے۔ مداح اُن کی کارکردگی، اشتہارات اور انٹرویوز پر خوب محبت نچھاور کرتے ہیں۔ ایسے میں روہت شرما ٹیلی ویژن پر ایک شو لے کر آئیں، تو سوچیے شیدائیوں کی خوشی کا کیا حال ہوگا۔ جی ہاں، جلد ہی آپ روہت شرما کو ایک ٹی وی شو میں دیکھنے والے ہیں۔ اس کا ٹیزر بھی ریلیز کر دیا گیا ہے، جس میں روہت خود یہ سوال پوچھ رہے ہیں کہ اگر وہ ٹی وی پر اپنا انداز لے کر آئیں گے تو کیا ہوگا؟

کرکٹر روہت شرما کا جو ٹیزر سوشل میڈیا پر شیئر کیا گیا ہے، وہ کرکٹ شیدائیوں کے ساتھ ساتھ عام شائقین کی بھی جستجو بڑھانے والا ہے۔ ٹیزر میں دکھایا گیا ہے کہ روہت اپنے مداحوں سے ملاقات کر رہے ہیں۔ مداح اُن سے ’کوئی گارڈن میں نہیں گھومے گا‘ والا ڈائیلاگ بولنے کو کہتے ہیں۔ اس مطالبہ سے وہ پریشان ہو جاتے ہیں۔ اسی دوران وہ فون کر کے اپنے گھر پر گارڈن کا کام رکوا دیتے ہیں۔

ٹیزر کے آخر میں روہت کہتے ہیں ’’دو لائنیں کیا بول دیں، اتنی وائرل ہو گئیں۔ جب میرا پورا شو آئے گا تو کیا ہوگا؟‘‘ ٹیزر میں یہ نہیں بتایا گیا ہے کہ اُن کے شو کا کیا نام ہے اور یہ کس بارے میں ہے۔ تاہم روہت نے ٹیزر کے ذریعے اپنے مداحوں کا جوش بڑھا دیا ہے۔ اُن کا شو سونی ٹی وی پر آنے والا ہے۔ بتایا جاتا ہے کہ روہت شرما اپنی خاص حاضر جوابی اور فطری دلکشی کے ساتھ اسکرین پر نظر آئیں گے۔ یعنی ناظرین ایک تفریحی شو کی امید کر سکتے ہیں۔

قابل ذکر ہے کہ روہت شرما ایسے پہلے کرکٹر نہیں ہیں جو کسی شو میں نظر آنے والے ہیں۔ اس سے پہلے سورو گانگولی، نوجوت سنگھ سدھو، ہربھجن سنگھ، وسیم اکرم اور سری سنت جیسے کرکٹر بھی ٹی وی پر اپنی موجودگی درج کرا چکے ہیں۔