آئی آئی ایم سی میں اُردو صحافت پوسٹ گریجویٹ ڈپلومہ کورس میں داخلہ کا عمل شروع

نئی دہلی: انڈین انسٹی ٹیوٹ آف ماس کمیونکیشن (آئی آئی ایم سی) میں تعلیمی سال 27-2026 کیلئے پوسٹ گریجویٹ ڈپلومہ میں داخلہ کے مقصد سے درخواست کا عمل شروع ہو گیا ہے۔ یہ ایک سالہ کل وقتی پیشہ ورانہ کورس ہے جس کا بنیادی مقصد طلبہ کو صحافت، میڈیا رپورٹنگ، رائٹنگ، براڈ کاسٹنگ، تحقیق، ایڈیٹنگ، تعلقات عامہ اور ڈیجیٹل کمیونیکیشن میں اُردو زبان کے خصوصی پس منظر کے ساتھ تربیت فراہم کرنا ہے۔

اُردو صحافت پی جی ڈپلوما کورس تعلیمی سیشن 27-2026 کے لیے درخواستیں دینے کا عمل 6 مئی 2026 سے آن لائن شروع ہو گیا ہے، جس کی آخری تاریخ 26 مئی 2026 ہے۔ تاہم داخلہ امتحان یکم جون 2026 کو منعقد ہوگا۔ نتائج کا اعلان 5 جون 2026 کو کیا جائے گا اور 15 جون 2026 کو ریزلٹ آئے گا۔ داخلہ کیلئے امتحان صرف اُردو زبان اور اُردو اسکرپٹ میں ہی ہوگا۔

درخواست دہندہ آئی آئی ایم سی کی ویب سائٹ http://www.iimc.gov.in یا https://share.google/Pjaq9ymooJctuOBKz سے درخواست فارم حاصل کر سکتا ہے۔ داخلہ کے تعلق سے بات کرتے ہوئے کورس کے کنوینر محمد ثاقب نے بتایا کہ انڈین انسٹی ٹیوٹ آف ماس کمیونکیشن (آئی آئی ایم سی) صحافت کی دنیا میں اپنا ایک اہم مقام رکھتا ہے۔ یہاں سے کورس کرنے والے طلباء بڑے بڑے میڈیا ہاؤسز میں کام کر رہے ہیں۔ بنیادی طور پر اس کورس کا آغاز اُردو کے تربیت یافتہ صحافی تیار کرنے کی غرض سے کیا گیا تھا جس کے مثبت نتائج ہمیں دیکھنے کو مل رہے ہیں۔

محمد ثاقب نے بتایا کہ جن طلباء نے کسی تسلیم شدہ یونیورسٹی سے بیچلر کی ڈگری حاصل کی ہو وہ پی جی کورسز کے لیے درخواست دے سکتے ہیں۔ وہ طلبا جو اپنے بیچلر ڈگری کے آخری سال یا سمسٹر کے امتحان میں شریک ہوئے ہیں، داخلہ کے اہل ہیں۔ انتخاب ہونے پر ایسے طلبا کو اپنی عارضی مارک شیٹ یا سرٹیفکیٹ کی اصل کاپی 30 ستمبر 2026 تک جمع کرانی ہوگی۔ ان طلبا کو کورس مکمل کرنے پر ڈپلومہ تبھی دیا جائے گا جب وہ آئی آئی ایم سی کے دفتر میں اصل ڈگری پیش کریں گے۔

اس کورس کے لیے عمر کی حد کی بات کی جائے تو یکم اگست 2026 تک جنرل کیٹیگری میں 25 سال، او بی سی زمرہ میں 28 سال، ایس سی، ایس ٹی، پی ڈبلیو ڈی زمرہ میں 30 سال ہونی چاہیے۔ جو طلبا یہ اہلیت رکھتے ہیں وہ داخلے کے اہل ہوں گے۔ محمد ثاقب نے اُردو زبان کو فروغ دینے میں پیش پیش رہنے والی سماجی تنظیموں سے اپیل کرتے ہوئے کہا کہ اس کورس میں 30 سیٹیں ہیں جو کئی مطالبوں کے بعد بڑھائی گئی ہیں اور اب ہم سب کی ذمہ داری ہے کہ اس کورس کی اہمیت و افادیت کے بارے میں لوگوں کو بتائیں اور زیادہ سے زیادہ داخلہ کرانے میں مدد کریں۔