یروشلم میں اسرائیلی کھدائی سے مسجد اقصیٰ کے انہدام کا خطرہ، فلسطینی حکام کا سخت انتباہ

فلسطینی خبر رساں ادارے ’وفا‘ کے مطابق یروشلم گورنریٹ کے مشیر معروف الرفاعی نے ایک انٹرویو میں کہا کہ اسرائیل کئی برسوں سے زیرِ زمین کھدائیوں کا سلسلہ جاری رکھے ہوئے ہے اور اب ان سرنگوں کو اس طرح بڑھایا جا رہا ہے کہ وہ ارد گرد کی یہودی بستیوں کو آپس میں جوڑ سکیں۔ ان کے بقول یہ کارروائیاں مسجد اقصیٰ کی ساخت کے لیے براہِ راست خطرہ ہیں اور کسی بھی وقت اس کے کچھ حصے منہدم ہو سکتے ہیں۔

الرفاعی نے مزید کہا کہ یہ کھدائیاں محض آثار قدیمہ کے نام پر نہیں بلکہ اسرائیل کے سیاسی مقاصد کے تحت کی جا رہی ہیں، تاکہ مسجد اقصیٰ کے موجودہ اور طے شدہ جمود کو تبدیل کیا جا سکے۔ ان کے مطابق اسرائیل ایک پرانے منصوبے پر عمل کر رہا ہے جس کے تحت مسجد اقصیٰ کے قریب سے ایک نئی سڑک تعمیر کی جائے گی اور ایک پل بنا کر اناتا جنکشن کو حزمہ چیک پوائنٹ سے جوڑا جائے گا۔ اس مقصد کے لیے فلسطینیوں کی املاک، تعلیمی ادارے اور مذہبی مقامات سب کو نشانہ بنایا جا رہا ہے۔