ترنمول کانگریس کے 20 اراکین پارلیمنٹ نے اتوار (14 جون) کو دہلی میں لوک سبھا اسپیکر اوم برلا سے مل کر نیشنلسٹ سٹیزنز پارٹی آف انڈیا (این سی پی آئی) میں ضم ہونے کا اعلان کیا ہے۔ اس کے بعد اچانک ملک بھر میں این سی پی آئی کے بارے میں باتیں ہونے لگیں۔ یہ پارٹی تریپورہ اسمبلی انتخاب میں محض 822 ووٹ حاصل کر سکی تھی اور جس کا نام تک بھی لوگ نہیں جانتے، وہ اچانک سے قومی سیاست کے مرکز میں آ گئی ہے۔
الیکشن کمیشن کے ریکارڈ کے مطابق این سی پی آئی کو 20 جنوری 2023 کو ایک غیر تسلیم شدہ سیاسی جماعت (آر یو پی پی) کے طور پر رجسٹریشن ملا تھا۔ دلچسپ بات یہ ہے کہ مغربی بنگال میں رجسٹرڈ ہونے کے باوجود پارٹی نے اپنا پہلا انتخابی سفر 2023 میں ہونے والے تریپورہ اسمبلی انتخاب سے شروع کیا تھا۔ کمیشن کی دستاویزات کے مطابق پارٹی کو مجموعی طور پر صرف 1.13 لاکھ روپے کا چندہ حاصل ہوا تھا۔ دستاویزات کے مطابق پارٹی کی خزانچی شیولی کنڈو ہیں، وہ 2 دیگر اداروں ’بسوا بازار پرائیویٹ لمیٹڈ‘ اور ’پچھم بنگا اسنگٹھت مہیلا کرمی ایسوسی ایشن‘ میں بھی ڈائریکٹر ہیں۔ این سی پی آئی کے ساتھ ساتھ ان دونوں اداروں کا رجسٹرڈ پتہ بھی مغربی بنگال کے ضلع ہاوڑہ کے بنی پور علاقے میں درج ہے۔ پارٹی کے صدر اتیا کنڈو ہیں، جو شیولی کنڈو کے شوہر ہیں۔
این سی پی آئی کا رجسٹریشن مغربی بنگال کے پتے پر ہے، لیکن پارٹی نے اپنا پہلا انتخاب تریپورہ اسمبلی کا لڑا۔ میڈیا رپورٹس کے مطابق این سی پی آئی کے رہنما شانتنو ڈے نے بتایا کہ پارٹی نے ’تریپورہ ٹرائبل ایریاز آٹونومس ڈسٹرکٹ کونسل‘ (ٹی ٹی اے اے ڈی سی) خطے کے محروم قبائلی طبقات کی نمائندگی کرنے کے لیے تریپورہ اسمبلی انتخاب لڑنے کا فیصلہ کیا تھا۔ تریپورہ اسمبلی انتخاب میں پارٹی نے 7 اسمبلی نشستوں پر اپنے امیدوار اتارے تھے، لیکن 4 نشستوں پر نامزدگی کے کاغذات مسترد ہو گئے۔ ایسی صورتحال میں پارٹی صرف 2 نشستوں پر ہی اپنے انتخابی نشان کے ساتھ الیکشن لڑ سکی، جبکہ ایک نشست پر آزاد امیدوار کی حمایت کی گئی۔
این سی پی آئی کے امیدواروں نے تریپورہ کی چاومانو نشست پر 536 ووٹ حاصل کیے اور کیلاشہر نشست پر پارٹی کو 286 ووٹ ملے۔ دونوں نشستوں کو ملا کر پارٹی کو مجموعی طور پر صرف 822 ووٹ ملے۔ ایک اور امیدوار کرشن کمار دیب برما نے امباسا نشست سے بطور آزاد امیدوار انتخاب لڑا اور 376 ووٹ حاصل کیے۔ اس طرح این سی پی آئی یا اس کا حمایت یافتہ کوئی بھی امیدوار جیت کے قریب نہیں پہنچ سکا۔ دوسری جانب اتوار کو ہونے والی اچانک سیاسی تبدیلی کے بعد این سی پی آئی ملک کی ایک بڑی سیاسی طاقت بن گئی ہے اور اب اس کے پاس 20 لوک سبھا اراکین پارلیمنٹ ہیں۔ ٹی ایم سی کے 20 باغی اراکین پارلیمنٹ نے این سی پی آئی میں انضمام کا اعلان کیا ہے۔
این سی پی آئی لیڈر شانتنو ڈے کے مطابق پارٹی نے 2023 میں مغربی بنگال پنچایت انتخابات لڑنے کا بھی منصوبہ بنایا تھا، لیکن وسائل کی کمی کے باعث ایسا ممکن نہ ہو سکا۔ انہوں نے بتایا کہ تریپورہ انتخاب کے بعد مالی معاملات کو لے کر پارٹی کے اندرونی اختلافات ابھر کر سامنے آئے، جس کی وجہ سے تنظیمی سرگرمیاں تقریباً ٹھپ ہو گئیں اور پارٹی گمنامی کے اندھیرے میں کھو گئی۔ بعد میں پارٹی نے 2026 کے مغربی بنگال اسمبلی انتخاب کی تیاری کرنے پر بھی غور کیا، لیکن وسائل کی کمی یہاں بھی رکاوٹ بن گئی۔
واضح رہے کہ ترنمول کانگریس کے تقریباً دو تہائی اراکین پارلیمنٹ کے این سی پی آئی میں انضمام کے اعلان کے بعد یہ پارٹی ملک کی اہم ترین سیاسی جماعتوں کی صف میں کھڑی ہو گئی ہے۔ باغی اراکین پارلیمنٹ نے ترنمول کانگریس سے الگ ہونے کے اعلان کے بعد اتوار کی شام لوک سبھا اسپیکر اوم برلا سے ملاقات کی۔ اس ملاقات میں باغی اراکین نے ایوان میں الگ بیٹھنے کے انتظامات کرنے کا بھی مطالبہ کیا۔ ملاقات کے بعد رکن پارلیمنٹ کاکولی گھوش دستی دار نے بتایا کہ ایک الگ پارلیمانی گروپ کے طور پر منظوری دینے کے لیے اسپیکر کو خط سونپا گیا ہے۔
باغی اراکین پارلیمنٹ کے گروپ میں سدیپ بندوپادھیائے بھی شامل ہیں، جنہیں ٹی ایم سی سربراہ ممتا بنرجی کا انتہائی قریبی مانا جاتا تھا۔ سدیپ بندوپادھیائے نے لوک سبھا اسپیکر سے ملاقات کے بعد کہا کہ این سی پی آئی میں انضمام محض پہلا قدم ہے اور جولائی میں باغی گروپ اصل ٹی ایم سی پر اپنا دعویٰ پیش کرے گا۔
