پیٹرول 2.61 اور ڈیزل 2.71 روپے مہنگا، مہنگائی بڑھنے کا خدشہ

گزشتہ 10 دنوں میں چوتھی بار پیٹرول اور ڈیزل کی قیمتوں میں اضافہ کیا گیا ہے۔ سوموار  (25 مئی) کو پیٹرول 2.61 روپے اور ڈیزل 2.71 روپے مہنگا ہو ا، جس کے بعد دہلی میں پیٹرول کی قیمت 100 روپے فی لیٹر سے تجاوز کر گئی ہے۔ مسلسل بڑھتی ہوئی قیمتوں کے باعث مال برداری اور روزمرہ استعمال کی اشیاء کی لاگت بڑھنے کا خدشہ ہے۔

نئی دہلی کے ایک پیٹرول پمپ پر گاڑی میں ایندھن بھرتا ہوا ملازم۔ (فوٹو: پی ٹی آئی)

نئی دہلی: ملک میں ایک بار پھر پیٹرول اور ڈیزل کی قیمتوں میں اضافہ کیا گیا ہے۔ گزشتہ 10–11 دنوں کے دوران یہ چوتھا اضافہ ہے، اور اس کے ساتھ ہی دہلی میں پیٹرول کی قیمت 100 روپے فی لیٹر سے تجاوز کر گئی ہے۔ مسلسل بڑھتی ہوئی قیمتوں نے مہنگائی اور روزمرہ اشیاء کی قیمتوں کے بارے میں نئی تشویش پیدا کر دی ہے۔

سوموار (25 مئی) کو پیٹرول کی قیمت میں 2.61 روپے فی لیٹر اور ڈیزل میں 2.71 روپے فی لیٹر کا اضافہ کیا گیا۔ اس کے بعد دہلی میں پیٹرول کی قیمت بڑھ کر 102.12 روپے فی لیٹر جبکہ ڈیزل 95.20 روپے فی لیٹر ہو گیا۔

گزشتہ 15مئی سے شروع ہونے والے اس اضافے کے سلسلے میں اب تک پیٹرول اور ڈیزل کی قیمتوں میں مجموعی طور پر تقریباً 7.5 روپے فی لیٹر اضافہ ہو چکا ہے۔

دہلی میں چار سال بعد پیٹرول کی قیمت دوبارہ 100 روپے سے تجاوز کر گئی ہے۔ اس سے قبل مئی 2022 میں روس-یوکرین جنگ کے دوران قیمتیں اس سطح تک پہنچی تھیں۔

مہا نگروں میں بھی ایندھن کی قیمتوں میں تیز اضافہ دیکھا گیا۔ کولکاتہ میں پیٹرول کی قیمت سب سے زیادہ بڑھی اور یہ 113.51 روپے فی لیٹر تک پہنچ گئی، جبکہ ڈیزل 99.82 روپے فی لیٹر ہو گیا۔ ممبئی میں پیٹرول 111.21 روپے اور ڈیزل 97.83 روپے فی لیٹر فروخت ہو رہا ہے۔ چنئی میں پیٹرول 107.77 روپے اور ڈیزل 99.55 روپے فی لیٹر ہو گیا ہے۔

اس سے قبل سنیچر کو بھی پیٹرول اور ڈیزل کی قیمتوں میں بالترتیب 87 پیسے اور 91 پیسے کا اضافہ کیا گیا تھا۔ اسی دن دہلی میں سی این جی کی قیمت بھی ایک روپے فی کلوگرام بڑھا کر 81.09 روپے کر دی گئی تھی۔

ماہرین کا ماننا ہے کہ ڈیزل کی قیمتوں میں اضافے کا اثر صرف گاڑی چلانے والوں تک محدود نہیں رہے گا۔ مال برداری کی لاگت بڑھنے سے غذائی اشیاء اور دیگر روزمرہ استعمال کی چیزوں کی قیمتوں پر بھی دباؤ پڑ سکتا ہے۔ گزشتہ مہینوں میں دودھ اور بریڈ جیسی اشیاء کی قیمتوں پر ایندھن کی بڑھتی لاگت کا اثر پہلے ہی دیکھا جا چکا ہے۔

دلچسپ بات یہ ہے کہ جس دن ملک میں ایندھن کی قیمتیں بڑھائی گئیں، اسی دن بین الاقوامی مارکیٹ میں خام تیل کی قیمتوں میں کمی ریکارڈ کی گئی۔ عالمی معیار برینٹ کروڈ سوموار کو تقریباً پانچ فیصد گر کر 100 ڈالر فی بیرل سے نیچے آ گیا اور 98.59 ڈالر فی بیرل پر پہنچ گیا۔

بتایا جا رہا ہے کہ امریکہ اور ایران کے درمیان ممکنہ امن معاہدے کی خبروں کے بعد عالمی مارکیٹ میں خام تیل کی قیمتوں میں نرمی آئی ہے۔ تاہم، گھریلو مارکیٹ میں ایندھن کی قیمتوں پر اس کا اثر فی الحال نظر نہیں آیا۔

Related