عام آدمی پارٹی بی جے پی کی ’بی ٹیم‘ ثابت ہوئی، اراکین کے انحراف پر دیویندر یادو کا سخت حملہ

دیویندر یادو نے اپنے بیان میں کہا کہ وہ پہلے دن سے یہ بات کہتے آ رہے تھے کہ عام آدمی پارٹی کا کردار مشکوک ہے اور اب جب اس کے کئی اراکین بی جے پی میں شامل ہو گئے ہیں تو یہ واضح ہو گیا ہے کہ دونوں جماعتوں کے درمیان پس پردہ تال میل موجود تھا۔ انہوں نے کہا کہ یہ صورتحال حیران کن نہیں بلکہ متوقع تھی، کیونکہ پارٹی کے اندرونی حالات شروع سے ہی غیر مستحکم رہے ہیں۔

انہوں نے مزید کہا کہ عام آدمی پارٹی کے قیام کے وقت عوام کو اس سے بڑی امیدیں وابستہ تھیں اور یہ تاثر دیا گیا تھا کہ یہ جماعت عام لوگوں کی خدمت کے لیے وجود میں آئی ہے۔ تاہم، ان کے مطابق اقتدار میں آنے کے فوراً بعد ہی پارٹی کے اہم رہنما یا تو خود الگ ہو گئے یا انہیں نکال دیا گیا، جس سے اس کی ساکھ کو شدید نقصان پہنچا۔