دہلی کی خواتین کے 2500 روپے کہاں گئے؟ ’مودی کی گارنٹی‘ پر آتشی کا تیکھا سوال

دہلی کی سیاست میں ایک بار پھر بیان بازی تیز ہو گئی ہے، جہاں عام آدمی پارٹی کی سینئر لیڈر اور دہلی اسمبلی میں قائد حزب اختلاف آتشی نے وزیر اعظم نریندر مودی اور بھارتیہ جنتا پارٹی کو سخت نشانہ بنایا ہے۔ انہوں نے خاص طور پر خواتین سے کیے گئے وعدوں، سرکاری سہولتوں میں کمی اور حالیہ سیاسی پیش رفت کو بنیاد بنا کر مرکز اور بی جے پی پر سنگین الزامات عائد کیے۔

پریس کانفرنس سے خطاب کرتے ہوئے آتشی نے کہا کہ جنوری 2025 میں دہلی اسمبلی انتخابات سے قبل وزیر اعظم نریندر مودی نے اعلان کیا تھا کہ 8 مارچ 2025 کو دہلی کی ہر خاتون کے بینک کھاتے میں 2500 روپے منتقل کیے جائیں گے۔ اس وعدے کو ’مودی کی گارنٹی‘ کا نام دیا گیا تھا، جسے بڑے پیمانے پر انتخابی مہم میں پیش کیا گیا، تاہم اب 8 مارچ 2026 بھی گزر چکی ہے، لیکن خواتین کو ایک روپیہ بھی موصول نہیں ہوا۔