جے شنکر نے کیا روسی تیل خریدنے کے فیصلے کا دفاع، یورپی ہتھیاروں کے استعمال پر اٹھائے سوال

فن لینڈ کی راجدھانی ہیلسنکی میں منعقدہ ’کلتارانتا مذاکرات‘ کے دوران ’ابھرتی طاقتیں اور نیا جغرافیائی سیاسی مقابلہ‘ کے موضوع پر ایک پینل مباحثے میں اظہار خیال کرتے ہوئے جے شنکر نے روس۔یوکرین تنازع کے حوالے سے ہندوستان کی پالیسی کا دفاع کیا۔ اس مباحثے میں فن لینڈ کی وزیر خارجہ ایلینا والٹونن اور متحدہ عرب امارات کی معاون وزیر خارجہ لانا نسیبہ بھی شریک تھیں۔

گفتگو کے دوران جے شنکر سے سوال کیا گیا کہ یورپ میں یہ تاثر پایا جاتا ہے کہ روس۔یوکرین جنگ کے معاملے میں ہندوستان کا رویہ روس کے لیے نسبتاً نرم ہے اور نئی دہلی روس سے تیل خریدنے میں خاص دلچسپی دکھاتا ہے۔ اس کے جواب میں انہوں نے کہا کہ ہندوستان تیل کی خریداری ہمیشہ قیمت اور دستیابی کی بنیاد پر کرتا ہے۔