بالی ووڈ کی مشہور اداکارہ اور سابق مس انڈیا سنگیتا بجلانی کو جھٹکا لگا ہے۔ دراصل سنگیتا کے پونے واقع فارم ہاؤس میں چوری ہو گئی ہے۔ بتایا جا رہا ہے کہ فارم ہاؤس میں چوروں کے ذریعہ جم کر کہرام مچایا گیا اور پھر وہ وہاں سے قیمتی سامان لے کر فرار ہو گئے۔
یہ واقعہ تب منظر عام پر آیا جب سنگیتا بجلانی کئی مہینوں کے بعد اپنے فارم ہاؤس پر پہنچیں۔ انہوں نے دیکھا کہ مین گیٹ ٹوٹا ہوا ہے اور احاطہ کے اندر کافی نقصان پہنچایا گیا ہے۔ اس کے بعد انہوں نے فوراً اس معاملے کی اطلاع پولیس کو دی۔
پونے دیہی پولیس کو دی گئی شکایت کے مطابق سنگیتا بجلانی نے بتایا کہ جب وہ فارم ہاؤس پہنچیں تو مین دروازہ اور کھڑکیوں کی حالت دیکھ کر وہ حیران رہ گئیں۔ انہوں نے اپنی شکایت میں لکھا، ’’میں اپنے والد کی طبیعت خراب ہونے کی وجہ سے لمبے وقت سے فارم ہاؤس نہیں جا سکی تھی۔ آج جب میں اپنی دو ہاؤس ہیلپ کے ساتھ وہاں گئی تو دیکھا کہ مین گیٹ ٹوٹا ہوا تھا اور اندر جا کر پتہ چلا کہ کھڑکی کی گریل بھی ٹوٹی پڑی ہے۔ ایک ٹی وی سیٹ غائب تھا جبکہ دوسرا پوری طرح سے ٹوٹا ہوا تھا۔
اس کے علاوہ انہوں نے بتایا کہ چوروں نے اوپری منزل پر بھاری توڑ پھوڑ کی ہے۔ گھر کے سبھی بستر ٹوٹے پائے گئے اور کئی گھریلو اور قیمتی سامان بھی غائب تھے۔ یہی نہیں چوروں کے سیکوریٹی کے لیے لگائے گئے سی سی ٹی وی کیمروں کو بھی نشانہ بنایا اور انہیں نقصان پہنچایا ہے۔
اس معاملے میں لونا والا پولیس اسٹیشن کے سینئر انسپکٹر دنیش تائڈے نے اطلاع دی کہ شکایت ملنے کے بعد پولیس کی ایک ٹیم موقع پر بھیجی گئی ہے۔ ٹیم نے جائے وقوع کا معائنہ کیا اور ثبوت جمع کیے ہیں۔ انہوں نے بتایا، ’’چوری کے کُل نقصان اور ٹوٹے پھوٹے سامانوں کی فہرست بنا کر مقدمہ درج کیا جائے گا۔ فی الحال ہم معاملے کی سنجیدگی سے جانچ کر رہے ہیں۔‘‘
پولیس کا ماننا ہے کہ یہ واقعہ فارم ہاؤس کے طویل عرصے سے بند رہنے کی وجہ سے پیش آیا ہوگا، جس سے چوروں کو وہاں آسانی سے دراندازی کرنے کا موقع ملا۔ آس پاس کے علاقے میں لگے سی سی ٹی وی کیمروں کی فوٹیج بھی کھنگالی جا رہی ہے تاکہ مشتبہ کی پہچان کی جا سکے۔
واضح رہے کہ سنگیتا بجلانی کا نام 80 اور 90 کی دہائی کی مشہور اداکاراؤں میں شمار ہوتا ہے۔ انہوں ںے محض 16 سال کی عمر میں ماڈلنگ کی دنیا میں قدم رکھا تھا اور سال 1980 میں مس انڈیا کا خطاب جیت کر سرخیوں میں آ گئی تھیں۔ اس کے بعد انہوں نے بالی ووڈ کا رخ کیا اور تری دیو، ہتھیار، وشنو دیوا اور یوگاندھر جیسی کئی فلموں میں اداکاری کی۔ بعد میں انہوں نے ہندوستانی کرکٹ ٹیم کے سابق کپتان محمد اظہر الدین سے شادی کرنے کے بعد بالی ووڈ سے کنارہ اختیار کر لیا تھا۔ ویسے سنگیتا بجلانی کی سلمان خان سے بھی گہری دوستی ہے۔
