عآپ نے ایم ایل اے کنور وجئے پرتاپ کو پارٹی سے معطل کیا، ڈرگس مخالف مہم میں رکاوٹ ڈالنے کا الزام

عام آدمی پارٹی نے امرتسر شمالی سے ایم ایل اے اور سابق آئی پی ایس آفیسر کنور وجئے پرتاپ سنگھ کو 5 سال کے لیے پارٹی سے معطل کر دیا ہے۔ اطلاع کے مطابق پارٹی کی سیاسی معاملوں کی کمیٹی نے کنور وجئے پرتاپ کی پارٹی مخالف سرگرمیوں اور پنجاب حکومت کی ڈرگس کے خلاف مہم میں رکاوٹ ڈالنے کے الزام میں یہ قدم اٹھایا ہے۔

عام آدمی پارٹی سے معطل ہونے کے بعد کنور وجئے پرتاپ سنگھ نے اپنے سوشل میڈیا اکاؤنٹ پر ایک پوسٹ شیئر کیا ہے۔ اس پوسٹ میں انہوں نے لکھا ہے، ’’کبیر جیسو مرنے تے جاگو ڈرے میرے مانی آنندو‘‘۔

کنور وجئے پرتاپ سنگھ کوٹک پورہ اور بہیبل کلاں معاملے کی جانچ کرنے والی ایس آئی ٹی کے سربراہ رہ چکے ہیں۔ آئی جی کنور وجئے پرتاپ سنگھ اپنے استعفیٰ پر قائم ہیں۔ حال ہی میں کنور وجئے پرتاپ نے شیرو مانی اکالی دل کے سینئر رہنما وکرم سنگھ مجیٹھیا کے خلاف محکمہ نگرانی کی کارروائی اور ان کی گرفتار پر سوال اٹھائے تھے۔

کنور وجئے نے اپنے فیس بُک پر اس سلسلے میں لکھا تھا، ’’چاہے وہ رہنما ہو، اداکار ہو، امیر ہو یا غریب، دوست ہو یا دشمن۔ صبح صبح کسی کے گھر پر چھاپہ مارنا اخلاقی اصول کے خلاف ہے۔ تقریباً سبھی حکومتوں نے اپنے فائدے کے لیے پولیس اور ویجی لینس ایجنسیوں کا غلط استعمال کیا ہے، لیکن اس کا نتیجہ کبھی خاص نہیں رہا ہے۔‘‘

انہوں نے عوامی منچ پر بھی مجیٹھیا کی اہلیہ کے ساتھ ویجی لینس ٹیم کی بحث کا ویڈیو شیئر کرتے ہوئے حکومت کی کارروائی کو نامناسب بتایا تھا۔ انہوں نے کہا تھا کہ مجیٹھیا جیل میں تھے تب پنجاب حکومت نے کوئی پوچھ تاچھ نہیں کی اور ان کی ضمانت میں مدد کی، لیکن اب اچانک کارروائی شروع کرنا سوال اٹھاتا ہے۔ اس بیان کو عام آدمی پارٹی نے اپنے نظریہ اور ڈرگس کی مخالفت میں چل رہی مہم کے خلاف مانا۔

واضح رہے کہ شیرومنی اکالی دل کے رہنما اور سابق وزیر بکرم سنگھ مجیٹھیا کو 25 جون کو پنجاب ویجی لینس بیورو نے امرتسر میں ان کے گھر سے گرفتار کر لیا تھا۔ مجیٹھیا پر 540 کروڑ روپے سے زیادہ کی ڈرگ منی لانڈرنگ میں شامل ہونے کا الزام ہے۔ مجیٹھیا کو موہالی کورٹ نے 7 دن کی پولیس ریمانڈ پر بھیجا ہے۔ اب ان کی پیشی 2 جولائی کو ہوگی۔