جنوبی کوریا میں بیلٹ پیپر بحران پر احتجاج نویں روز بھی جاری، دوبارہ انتخابات کرانے کا مطالبہ

مقامی میڈیا کے مطابق سیول کے جنوبی علاقے جامسل میں واقع ایس کے اولمپک ہینڈ بال جمنازیم کے اطراف صبح کے وقت تقریباً 700 افراد جمع ہوئے۔ مظاہرین قومی پرچم اٹھائے ہوئے تھے اور نعرے بازی کے ذریعے انتخابی نتائج پر اپنے عدم اعتماد کا اظہار کر رہے تھے۔ اگرچہ گزشتہ رات اسی مقام پر تقریباً 8 ہزار افراد موجود تھے، تاہم احتجاجی تحریک اب بھی مکمل طور پر ختم نہیں ہوئی ہے۔

یہ تنازع 3 جون کو ہونے والے میئر اور گورنر انتخابات کے بعد سامنے آیا، جب ملک بھر کے متعدد پولنگ مراکز پر بیلٹ پیپر ختم ہو گئے تھے۔ قومی الیکشن کمیشن کے مطابق 26 پولنگ مراکز پر ووٹنگ کا عمل عارضی طور پر روکنا پڑا، جبکہ کئی ووٹر ووٹ ڈالے بغیر واپس لوٹ گئے کیونکہ وہاں بیلٹ پیپر دستیاب نہیں تھے۔