سماجوادی پارٹی کے سینئر لیڈر اعظم خان اور ان کے بیٹے عبداللہ اعظم سے متعلق 2 پین کارڈ معاملے میں ایم پی-ایم ایل اے سیشن کورٹ نے آج ایک اہم فیصلہ سنایا۔ عدالت نے حکومت کی اپیل منظور کرتے ہوئے اعظم خان کی سزا 7 سال سے بڑھا کر 10 سال کر دی ہے۔ ساتھ ہی ان پر عائد 50 ہزار روپے کا جرمانہ بڑھا کر 5 لاکھ روپے کر دیا گیا ہے۔ حالانکہ اس معاملے میں عبداللہ اعظم کو راحت ملی ہے۔ ان کی 7 سال کی سزا برقرار رکھی گئی ہے، لیکن جرمانے کی رقم میں اضافہ کیا گیا ہے۔ پہلے ان پر 50 ہزار روپے جرمانہ عائد کیا گیا تھا، جسے بڑھا کر 4 لاکھ روپے کر دیا گیا ہے۔
اس معاملے میں نومبر 2025 میں مجسٹریٹ کورٹ نے اعظم خان اور عبداللہ اعظم دونوں کو 7-7 سال قید اور 50-50 ہزار روپے جرمانے کی سزا سنائی تھی۔ فیصلے کے بعد دفاعی فریق نے سزا کے خلاف اپیل دائر کی تھی، جبکہ استغاثہ نے سزا بڑھانے کے مطالبے کے ساتھ ایم پی-ایم ایل اے سیشن کورٹ میں اپیل کی تھی۔ سزا بڑھانے سے متعلق اپیل پر دونوں فریقین کے دلائل مکمل ہونے کے بعد عدالت نے ہفتہ کے روز فیصلہ سنایا۔ عدالت نے فریق استغاثہ کی دلیلوں کو قبول کرتے ہوئے اعظم خان کی سزا اور جرمانے دونوں میں اضافہ کر دیا۔
اس سے قبل 16 مئی کو 2019 کے لوک سبھا انتخابات کے دوران رامپور کے ضلع مجسٹریٹ (ڈی ایم) کو ’تنخواہ دار‘ کہتے ہوئے ان سے جوتے صاف کرانے سے متعلق بیان دینے کے کیس میں عدالت نے سماجوادی پارٹی لیڈر اعظم خان کو 2 سال قید کی سزا سنائی تھی۔ اس معاملہ میں اعظم خان پر 20 ہزار روپے جرمانہ بھی عائد کیا گیا تھا۔ سابق ضلع مجسٹریٹ سے متعلق بیان کے کیس میں سزا سنائے جانے کے دوران اعظم خان جیل سے ویڈیو کانفرنسنگ کے ذریعے عدالتی کارروائی سے منسلک رہے۔ الزام تھا کہ 2019 کے لوک سبھا انتخابات کے دوران ایک روڈ شو کے دوران انہوں نے عوام کے درمیان یہ بیان دیا تھا۔ اس وقت کا انتخاب ایس پی-بی ایس پی اتحاد کے تحت لڑا جا رہا تھا اور رامپور لوک سبھا سیٹ سے اعظم خان امیدوار تھے۔
متنازعہ بیان دیتے وقت کی اعظم خان کی ویڈیو وائرل ہو گئی تھی، جس کے بعد الیکشن کمیشن نے ریاستی الیکشن کمیشن سے رپورٹ طلب کی تھی۔ ریاستی الیکشن کمیشن نے ضلع الیکشن افسر سے رپورٹ مانگتے ہوئے کارروائی کے احکامات دیے تھے۔ اس حکم کے بعد چمراوا اسمبلی حلقہ کے اے آر او اور ٹانڈا کے ایس ڈی ایم گھنشیام تریپاٹھی نے 11 مئی 2019 کو مقدمہ درج کرایا تھا۔ مقدمہ درج ہونے کے بعد پولیس نے عدالت میں چارج شیٹ داخل کی تھی۔ ایم پی-ایم ایل اے مجسٹریٹ کورٹ میں سماعت مکمل ہونے کے بعد ایم پی-ایم ایل اے مجسٹریٹ شوبھت بنسل کی عدالت نے اس معاملے میں ایس پی رہنما اعظم خان کو قصوروار قرار دیا۔ اس کے بعد عدالت نے اعظم خان کو 2 سال قید اور 20 ہزار روپے جرمانہ ادا کرنے کی سزا سنائی۔
