جو حکومت طلبا کے سوالوں کا جواب لاٹھی سے دیتی ہے، وہ جوابدہی سے نہیں، خوف سے چلتی ہے: راہل گاندھی

کانگریس لیڈر نے کہا کہ جب طلبا، نیشنل اسٹوڈنٹس یونین آف انڈیا اور کانگریس کارکنان انصاف کی مانگ کر رہے ہیں تو مختلف ریاستوں میں طاقت کے استعمال کی خبریں سامنے آ رہی ہیں۔ انہوں نے کہا کہ ان کی جماعت اس وقت تک خاموش نہیں بیٹھے گی جب تک امتحانی نظام کو محفوظ اور مضبوط بنانے کے لیے مؤثر اقدامات نہیں کیے جاتے اور ذمہ دار افراد کے خلاف کارروائی نہیں ہوتی۔

راہل گاندھی نے وزیر تعلیم دھرمیندر پردھان کے استعفے کا مطالبہ دہراتے ہوئے کہا کہ ملک میں ایسا مضبوط نظام بننا چاہیے جس سے امتحانی عمل پر اعتماد بحال ہو اور نوجوانوں کا مستقبل محفوظ رہے۔ انہوں نے یہ بھی کہا کہ نوجوانوں کے مسائل کو نظر انداز کرنا کسی بھی حکومت کے لیے مناسب نہیں اور طلبا کے سوالوں کا جواب دینا حکومت کی ذمہ داری ہے۔