واشنگٹن میں نئے دور کی بات چیت 20 اپریل سے شروع

یہ بات چیت ایک ایسے وقت میں ہو رہی ہے جب امریکہ کی تجارتی پالیسی میں نمایاں تبدیلیاں سامنے آئی ہیں۔ امریکی سپریم کورٹ کے ایک فیصلے کے بعد صدر ڈونالڈ ٹرمپ کی جانب سے ہنگامی اختیارات کے تحت نافذ کیے گئے وسیع ٹیرف کو چیلنج کا سامنا کرنا پڑا تھا۔ اس کے بعد امریکی انتظامیہ نے 24 فروری سے 150 دن کے لیے تمام ممالک کی درآمدات پر 10 فیصد کا عارضی ٹیرف نافذ کر دیا۔

اس نئے ٹیرف نظام نے عالمی تجارت کے توازن کو متاثر کیا ہے اور ہندوستان و امریکہ دونوں کو اپنے مجوزہ تجارتی معاہدے پر دوبارہ غور کرنے کی ضرورت محسوس ہو رہی ہے۔ ابتدائی طور پر یہ معاہدہ 7 فروری کو پیش کیا گیا تھا، جس میں امریکہ نے ہندوستانی مصنوعات پر ٹیرف کو 50 فیصد سے کم کر کے 18 فیصد تک لانے پر رضامندی ظاہر کی تھی۔ اس میں روس سے تیل خریدنے پر عائد کچھ اضافی محصولات ختم کرنے کی تجویز بھی شامل تھی۔