کے کے آر سیزن میں ایک بھی جیت درج کرنے میں ناکام، گجرات ٹائٹنز نے 5 وکٹوں سے ہرایا

گجرات ٹائٹنز نے  کےکے آر یعنی کولکتہ نائٹ رائیڈرز کو 5 وکٹوں سے شکست دے دی۔ کپتان شبھمن گل نے 86 رنز کی میچ وننگ اننگز کھیلی اور آئی پی ایل 2026 میں نصف سنچری کی ہیٹ ٹرک بھی کی۔ان کے 86 رنز کی بدولت انہوں نے اورنج کیپ بھی حاصل کی۔ احمد آباد کے نریندر مودی اسٹیڈیم میں کھیلے گئے اس میچ میں کے کے آر نے پہلے بلے بازی کرتے ہوئے 180 رنز بنائے۔ جواب میں گجرات نے آخری اوور میں 5 وکٹوں سے فتح حاصل کی۔

شبھمن گل نے آئی پی ایل 2026 میں نصف سنچریوں کی ہیٹ ٹرک بنا کر گجرات ٹائٹنز کی جیت میں کلیدی کردار ادا کیا۔ اپنے پچھلے دو میچوں میں انہوں نے دہلی کیپٹلز اور لکھنؤ سپر جائنٹس کے خلاف بالترتیب 70 اور 56 رنز بنائے۔ اب کولکتہ کی ٹیم کے خلاف انہوں نے 86 رنز بنائے اور اس اننگز میں انہوں نے 8 چوکے اور 4 چھکے لگائے۔

دوسری جانب گجرات نے بھی فتوحات کی ہیٹ ٹرک کرلی ہے۔ گجرات کی ٹیم آئی پی ایل 2026 میں اپنے پہلے دو میچ ہار گئی تھی لیکن آخری تین میچ جیت کر اس نے پوائنٹس ٹیبل میں چوتھی پوزیشن حاصل کر لی ہے۔کولکتہ نائٹ رائیڈرز کی ٹیم نے بھی شرمناک ریکارڈ اپنے نام کرلیا۔ انڈین پریمیئر لیگ میں کولکتہ کی ٹیم کی یہ مسلسل شکست ہے۔ آئی پی ایل 2026 میں کے کے آر کی یہ 6 میچوں میں پانچویں شکست ہے جبکہ اس کا ایک میچ بارش کی وجہ سے ضائع ہو گیا تھا۔ کولکتہ اب تک سیزن میں ایک بھی جیت درج نہیں کر پائی ہے۔