1857ء کے مجاہدِ آزادی اور علمی و دینی تحریک کے معمار

اسی عظیم جدوجہد کے سرکردہ رہنماؤں میں مولانا قاسم نانوتویؒ کا نام نمایاں حیثیت رکھتا ہے۔ آپ کی ولادت 1832ء میں سہارنپور کے قصبہ نانوتا میں ہوئی۔ ابتدائی تعلیم اپنے چچا مولانا مہتاب علیؒ دیوبندی اور محمد نوازؒ سہارنپوری سے حاصل کی۔ بعد ازاں 1844ء میں دہلی کا رخ کیا جہاں مولانا مملوک علیؒ نانوتوی اور مفتی صدر الدینؒ دہلوی جیسے جلیل القدر اساتذہ سے علم حاصل کیا۔ اس کے علاوہ شاہ عبدالغنیؒ مجددی اور احمد علیؒ محدث سہارنپوری سے بھی استفادہ کیا، جس نے آپ کی علمی شخصیت کو جلا بخشی۔

تعلیم سے فراغت کے بعد کچھ عرصہ مکتبہ احمدی دہلی میں ادارت کے فرائض انجام دیے، مگر درس و تدریس کا سلسلہ ہمیشہ جاری رکھا۔ تاہم جب 1857ء میں میرٹھ سے انقلابی سپاہیوں نے انگریزوں کے خلاف علمِ بغاوت بلند کیا تو مولانا قاسم نانوتویؒ نے بھی میدانِ عمل میں قدم رکھا اور عملی جہاد میں شریک ہوگئے۔