دہلی میں ایل پی جی کی قلت پر کانگریس کارکنوں کا احتجاج

احتجاج کے دوران کارکنوں نے سڑک پر ایک عارضی چولہا قائم کیا اور علامتی طور پر اس پر چائے تیار کی۔ مظاہرین کا کہنا تھا کہ اس اقدام کے ذریعے وہ یہ دکھانا چاہتے ہیں کہ اگر گھروں میں گیس دستیاب نہ ہو تو لوگوں کو دوبارہ روایتی طریقوں سے کھانا پکانے پر مجبور ہونا پڑ سکتا ہے۔ اس موقع پر کارکنوں نے حکومت کے خلاف نعرے بازی بھی کی اور کہا کہ گیس کی قلت نے عام لوگوں کی زندگی کو شدید متاثر کر دیا ہے۔

ایک کانگریس رہنما نے میڈیا سے گفتگو کرتے ہوئے الزام لگایا کہ مرکزی حکومت کی پالیسیوں کے سبب ملک اس بحران کا شکار ہوا ہے۔ ان کا کہنا تھا کہ آج صورت حال یہ ہے کہ ہر رسوئی سے سلنڈر غائب ہوتا نظر آ رہا ہے اور لوگ گیس حاصل کرنے کے لیے لمبی قطاروں میں کھڑے ہونے پر مجبور ہیں۔ انہوں نے دعویٰ کیا کہ بعض مقامات پر گیس کے انتظار میں کھڑے افراد کی حالت تک خراب ہو رہی ہے۔