وزیر اعظم حالات پر نظر رکھے ہوئے ہیں، ہندوستانیوں کی سلامتی اولین ترجیح، ایس جے شنکر کا بیان

انہوں نے بتایا کہ حکومت نے 28 فروری کو ایک باضابطہ بیان جاری کر کے اس صورتحال پر گہری تشویش ظاہر کی تھی اور تمام فریقوں سے تحمل سے کام لینے، کشیدگی کو مزید بڑھنے سے روکنے اور شہریوں کی حفاظت کو ترجیح دینے کی اپیل کی تھی۔

ایس جے شنکر نے کہا کہ ہندوستان کا واضح موقف ہے کہ مسائل کے حل کے لیے بات چیت اور سفارتی راستہ اختیار کیا جانا چاہیے۔ انہوں نے اس بات پر بھی زور دیا کہ خطے کے تمام ممالک کی خود مختاری اور علاقائی سالمیت کا احترام ضروری ہے۔

وزیر خارجہ کے مطابق یکم مارچ کو وزیر اعظم نریندر مودی کی صدارت میں کابینہ کی سلامتی کمیٹی کا اجلاس بھی منعقد ہوا، جس میں ایران میں ہونے والے فضائی حملوں اور اس کے بعد خلیجی ممالک میں پیدا ہونے والی صورتحال پر تفصیلی غور کیا گیا۔ اجلاس میں خطے میں مقیم ہندوستانی برادری کی سلامتی، معاشی سرگرمیوں اور سفری مسائل پر بھی گفتگو کی گئی۔