بریت کے بعد اروند کیجریوال جذباتی ہو گئے، کہا- ’پورا مقدمہ فرضی تھا‘

نئی دہلی میں دہلی کی شراب پالیسی سے متعلق مقدمے میں بریت کے بعد سابق وزیر اعلیٰ اور عام آدمی پارٹی کے قومی کنوینر اروند کیجریوال جذباتی نظر آئے۔ راؤز ایونیو عدالت کے فیصلے کے فوراً بعد انہوں نے میڈیا سے گفتگو کرتے ہوئے کہا کہ ان کے خلاف پورا مقدمہ فرضی تھا اور انہیں جان بوجھ کر ایک جھوٹے کیس میں پھنسایا گیا۔

اروند کیجریوال نے دعویٰ کیا کہ آزاد ہندوستان کی سب سے بڑی سیاسی سازش رچی گئی تاکہ عام آدمی پارٹی کو ختم کیا جا سکے۔ انہوں نے وزیر اعظم نریندر مودی اور وزیر داخلہ امت شاہ پر سنگین الزامات عائد کرتے ہوئے کہا کہ ان کی شبیہ خراب کرنے کے لیے مسلسل کوشش کی گئی اور ٹیلی ویژن چینلوں پر انہیں بدعنوان ثابت کرنے کی مہم چلائی گئی۔