رِنکو سنگھ کے والد کھچندر سنگھ کا انتقال، گریٹر نوئیڈا کے ہاسپٹل میں آخری سانس

بدھ کے روز پریس کانفرنس میں ٹیم کے بیٹنگ کوچ ستانشو کوٹک نے بتایا تھا کہ رِنکو کے والد کی طبیعت ناساز ہے اور وہ جلد ٹیم سے دوبارہ جڑ جائیں گے۔ تاہم اب اس سانحے کے بعد یہ واضح نہیں کہ وہ ٹی ٹوئنٹی عالمی کپ میں آئندہ میچوں کے لیے کب دستیاب ہوں گے۔

اٹھائیس سالہ رِنکو اتر پردیش کے شہر علی گڑھ سے تعلق رکھتے ہیں اور محدود وسائل کے باوجود اپنی محنت کے بل پر قومی سطح تک پہنچے۔ والد کا سایہ اٹھ جانا ان کے لیے بڑا صدمہ ہے۔ کرکٹ شائقین اور سابق کھلاڑیوں نے اس مشکل گھڑی میں ان کے ساتھ اظہارِ ہمدردی کیا ہے اور دعا کی ہے کہ وہ اس دکھ کو حوصلے کے ساتھ برداشت کر سکیں۔