بہار میں بگڑتی صورت حال پر رابڑی دیوی کا حملہ، نظم و نسق کی ناکامی کے ساتھ تنخواہوں کے بحران کا انتباہ

خیال رہے کہ بہار میں نظم و نسق کی صورت حال کو لے کر راشٹریہ جنتا دل اور دیگر حزب اختلاف جماعتیں مسلسل حکومت کو گھیر رہی ہیں۔ پیر کے روز خواتین کے خلاف بڑھتے جرائم کے مسئلے پر اپوزیشن ارکان نے اسمبلی احاطے میں احتجاج بھی کیا۔ اس دوران ریاست میں امن و امان کی بگڑتی حالت پر سخت سوالات اٹھائے گئے۔

پٹنہ میں ذرائع ابلاغ سے گفتگو کرتے ہوئے رابڑی دیوی نے کہا کہ بہار میں قتل کے واقعات اب معمول بنتے جا رہے ہیں۔ ان کے مطابق روزانہ ریاست کے مختلف حصوں میں ہلاکتوں کی خبریں سامنے آ رہی ہیں، جب کہ عصمت دری اور لوٹ مار کے واقعات میں بھی اضافہ ہو رہا ہے۔ انہوں نے کہا کہ ایسے حالات میں عام شہری خود کو غیر محفوظ محسوس کر رہے ہیں۔