این سی آر میں آلودگی اور کڑاکے کی سردی کی دوہری مار، زہریلی فضا میں سانس لینے پر مجبور عوام

محکمہ موسمیات کے مطابق 9 جنوری کو صبح اور دوپہر کے اوقات میں درمیانے سے گھنے کہرے کی پیش گوئی کی گئی ہے۔ زیادہ سے زیادہ درجۂ حرارت 17 ڈگری اور کم سے کم 6 ڈگری سیلسیس ریکارڈ کیا گیا، جبکہ 10 اور 11 جنوری کو بھی کہرے کی کیفیت برقرار رہنے کا امکان ظاہر کیا گیا ہے۔ حدِ نگاہ میں کمی کے باعث سڑک اور ریل ٹریفک متاثر ہے، جس سے مسافروں کو مشکلات کا سامنا کرنا پڑ رہا ہے۔

دہلی کے مختلف علاقوں میں فضائی معیار اشاریہ انتہائی خراب سے سنگین درجوں میں ریکارڈ ہوا۔ آر کے پورم اور آنند وہار میں اشاریہ 388، اوکھلا فیز دوم میں 382، پٹپڑ گنج میں 364، سری فورٹ میں 365 اور ڈاکٹر کرنی سنگھ شوٹنگ رینج کے علاقے میں 366 درج کیا گیا۔ پنجابی باغ، چاندنی چوک، روہنی، سونیا وہار اور شری اربندو مارگ جیسے علاقوں میں بھی صورتحال نہایت تشویش ناک رہی۔