تلنگانہ کے وزیر اعلیٰ ریونت ریڈی کا کے سی آر کو کھلی بحث کا چیلنج

پریس کانفرنس سے خطاب کرتے ہوئے جمعرات کو وزیر اعلیٰ نے کہا کہ ریاستی حکومت دریائی پانی کی تقسیم سے متعلق تمام معاملات پر اسمبلی کا خصوصی اجلاس بلانے کے لیے تیار ہے۔ انہوں نے دعویٰ کیا کہ حکومت کے پاس ایسے ٹھوس شواہد موجود ہیں جن سے یہ ثابت کیا جا سکتا ہے کہ بی آر ایس کے دور میں تلنگانہ کو اس کے جائز حق کے پانی سے محروم رکھا گیا۔

ریونت ریڈی نے الزام عائد کیا کہ کے سی آر اور بی آر ایس نے گزشتہ دس برسوں میں دریائی پانی کے معاملے میں تلنگانہ کے عوام کے ساتھ دھوکہ کیا اور یہ رویہ متحدہ آندھرا پردیش کے دور سے بھی زیادہ نقصان دہ ثابت ہوا۔ انہوں نے کہا کہ اگر کے سی آر کو ان الزامات پر اعتراض ہے تو وہ ثبوتوں کے ساتھ عوام کے سامنے آئیں۔