سپریم کورٹ کا ہفتے میں دو دن ویڈیو کانفرنسنگ سے سماعت کا فیصلہ، ورک فرام ہوم اور کار پولنگ پر زور

یہ فیصلہ جمعہ کی صبح چیف جسٹس سوریہ کانت کی سربراہی میں منعقد ہونے والی فل کورٹ میٹنگ میں لیا گیا۔ سپریم کورٹ کی جانب سے جاری سرکلر میں کہا گیا ہے کہ نئے مقدمات کی سماعت کے لیے مقرر دنوں یعنی پیر اور جمعہ کو مکمل کارروائی ویڈیو کانفرنسنگ کے ذریعے ہوگی۔ اگر مستقبل میں عدالت کی جانب سے کسی اور دن کو بھی اس مقصد کے لیے مقرر کیا جاتا ہے تو اس دن بھی یہی نظام نافذ رہے گا۔

سپریم کورٹ کے جنرل سکریٹری بھرت پراشر کی جانب سے جاری سرکلر کے مطابق یہ اقدامات مرکزی حکومت کے 12 مئی 2026 کے دفتر یادداشت کے تناظر میں کیے گئے ہیں۔ اس میں ایندھن کی بچت اور غیر ضروری سفر کو کم کرنے پر زور دیا گیا تھا۔ عدالت نے اسی سلسلے میں ججوں کے درمیان کار پولنگ کو بھی فروغ دینے کا فیصلہ کیا ہے تاکہ سرکاری اور ذاتی گاڑیوں کے استعمال میں کمی لائی جا سکے۔