دہلی کی صاف نظر آنے والی ہوا موسم کی مہربانی، آلودگی میں حقیقی کمی نہیں آئی: اجے ماکن

اجے ماکن نے کہا کہ آج دہلی کے تقریباً تمام 41 نگرانی مراکز پر باریک معلق ذرات پی ایم 2.5 کی سطح عالمی ادارۂ صحت کی مقررہ حد سے زیادہ ہے، جبکہ پی ایم 10 کی مقدار ہندوستان کے قومی فضائی معیار سے بھی اوپر ریکارڈ کی جا رہی ہے۔ ان کے مطابق اگر موسم کے اثرات کو الگ کر دیا جائے تو شہر کی فضائی صورتحال مزید تشویش ناک نظر آتی ہے۔

ویڈیو میں پیش کیے گئے اعداد و شمار کے مطابق پی ایم 10 کی سطح گزشتہ سال کے مقابلے میں 18 فیصد زیادہ ہے، جبکہ کاربن مونو آکسائیڈ میں 13 فیصد اور سلفر ڈائی آکسائیڈ میں 12 فیصد اضافہ ریکارڈ کیا گیا ہے۔ اجے ماکن کا کہنا ہے کہ یہ اضافہ اس بات کا ثبوت ہے کہ آلودگی پر قابو پانے کے لیے اختیار کی گئی پالیسیاں مؤثر ثابت نہیں ہو سکیں۔ ان کے مطابق سات میں سے پانچ اہم آلودگی پھیلانے والے عناصر کی صورتحال یا تو جوں کی توں ہے یا پہلے سے زیادہ خراب ہو چکی ہے۔