اتر پردیش کے حمیر پور میں دردناک حادثہ، زیر تعمیر پل منہدم ہونے سے 6 مزدوروں کی موت

اتر پردیش کے حمیرپور ضلع میں ایک خوفناک حادثہ پیش آیا، جس میں کم از کم 6 لوگوں کی موت ہو گئی ہے۔ میڈیا رپورٹس کے مطابق بیتوا ندی پر زیر تعمیر پل کا ایک حصہ اچانک بھربھرا کر گر پڑا۔ اس حادثہ کی وجہ سے وہاں موجود کئی مزدور ملبہ میں دب گئے۔ ملبہ میں دبنے سے 6 مزدوروں کی موت ہو چکی ہے، جبکہ کئی دیگر زخمی ہوئے ہیں۔ کچھ لوگوں کے اب بھی ملبہ میں دبے ہونے کا اندیشہ ظاہر کیا جا رہا ہے۔ حادثہ کے بعد پورے علاقہ میں افرا تفری مچ گئی، لیکن راحت رسانی کا کام بھی فوری طور پر شروع کر دیا گیا ہے۔

دراصل کرارا تھانہ حلقہ میں مورکندر پرسانی سے نوتھی گاؤں تک بیتوا ندی پر پل کی تعمیر کا کام چل رہا ہے۔ جمعہ کی علی الصبح تقریباً 3 بجے اچانک موسم خراب ہو گیا۔ تیز آندھی اور بارش کے درمیان پل کی سٹرنگ، سلیب اور کوٹھی منہدم ہو گئی۔ بتایا جا رہا ہے کہ حادثہ کے وقت کئی مزدور پل کے اسی حصے میں سو رہے تھے، جس کی وجہ سے انھیں سنبھلنے کا موقع تک نہیں ملا۔

مقامی لوگوں کا کہنا ہے کہ تیز ہواؤں کے ساتھ زوردار آواز آئی، جس کے بعد پل کا ایک حصہ گر گیا۔ واقعہ کے فوراً بعد آس پاس کے لوگ جائے وقوع پر پہنچے اور ملبہ میں دبے لوگوں کو نکالنا شروع کیا۔ بعد میں اطلاع ملنے پر پولیس، انتظامیہ اور ایس ڈی آر ایف کی ٹیمیں بھی جائے وقوع پر پہنچ گئیں۔ ریسکیو ٹیم جے سی بی اور دیگر مشینوں کی مدد سے لگاتار ملبہ ہٹانے میں مصروف ہے۔ جائے وقوع پر ایس ڈی ایم، سی او سمیت کئی تھانوں کی پولیس فورس تعینات کی گئی ہے۔ افسران کا کہنا ہے کہ بچاؤ مہم لگاتار جاری ہے۔ اندیشہ ظاہر کیا جا رہا ہے کہ ہلاکتوں کی تعداد بڑھ سکتی ہے۔

میڈیا رپورٹس کے مطابق حادثہ میں ہلاک ہونے والوں میں باندہ ضلع کے چیلا تھانہ حلقہ باشندہ لوکیندر نشاد، کلدیپ نشاد، بھورا گڑھ باشندہ ساونت یادو، سبھاجیت، حمیر پور کے للپور تھانہ حلقہ کے سواسا خرد باشندہ پشپیندر سنگھ چوہان اور اچپورا باشندہ 42 سالہ راجیش پال شامل ہیں۔ حادثہ کے بعد اس جگہ پر سیکورٹی انتظامات اور تعمیری کام میں لاپروائی سے متعلق سوالات اٹھنے لگے ہیں۔ انتظامیہ نے اس معاملہ کی جانچ کا حکم صادر کر دیا ہے۔ افسران کا کہنا ہے کہ جانچ رپورٹ آنے کے بعد ذمہ دار لوگوں کے خلاف کارروائی کی جائے گی۔