دہلی کے 300 سال پرانے گاؤں ’مشرقی مَحرَم نگر‘ کا کوئی گھر اجڑنے نہیں دیں گے: دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے مشرقی محرم نگر میں منعقدہ مہاپنچایت سے خطاب کرتے ہوئے کہا کہ 300 سال سے آباد اس گاؤں کے ایک بھی گھر کو مسمار نہیں ہونے دیا جائے گا۔ انہوں نے کہا کہ اگر حکومت یا انتظامیہ نے یہاں بولڈوزر چلانے کی کوشش کی تو اسے ان کی مزاحمت کا سامنا کرنا ہوگا اور بولڈوزر کو ان کے اوپر سے گزر کر جانا پڑے گا۔

خیال رہے کہ راجدھانی دہلی کے اندرا گاندھی بین الاقوامی ہوائی اڈے کے قریب واقع 15 ہزار کی آبادی والے 300 سال پرانے محرم نگر گاؤں کے لوگوں کو نیشنل سکیورٹی گارڈ (این ایس جی) نے 30 ستمبر تک خالی کرنے کا نوٹس دیا ہے۔ اس سے گاؤں والوں میں غصہ اور خوف دونوں پھیل گئے۔ اگرچہ دہلی ہائی کورٹ نے اس نوٹس پر روک لگا دی ہے اور 16 دسمبر تک کا اسٹے آرڈر جاری کیا مگر دیہاتیوں کی فکر ختم نہیں ہوئی۔