بہار ایس آئی آر پر سپریم کورٹ کا الیکشن کمیشن کو حکم- ’آدھار قبول کرنا ہی ہوگا‘

عدالت نے حیرت کا اظہار کیا کہ سیاسی جماعتیں ایس آئی آر کے دوران حذف شدہ ووٹروں کے نام درست کروانے میں فعال کردار کیوں نہیں ادا کر رہیں۔ الیکشن کمیشن نے عدالت کو بتایا کہ بہار کے ایس آئی آر میں اب تک 85,000 نئے ووٹر سامنے آئے ہیں، جبکہ سیاسی جماعتوں کے بوتھ سطح کے نمائندوں نے صرف دو اعتراضات دائر کیے ہیں۔

خیال رہے کہ الیکشن کمیشن نے سپریم کورٹ کی صلاح کے باوجود آدھار کو قبول کرنے سے انکار کیا تھا، جس کی وجہ سے حزب اختلاف اور سماجی کارکن سب سے زیادہ احتجاج کر رہے تھے۔ ان کا موقف تھا کہ اگر آدھار قبول نہ کیا گیا تو پسماندہ طبقات، خاص طور پر دلت، آدیواسی اور مسلمان بڑے پیمانے پر حق رائے دہی سے محروم ہو جائیں گے۔ اپوزیشن نے سڑکوں سے لے کر پارلیمنٹ تک ایس آئی آر کے معاملہ پر الیکشن کمیشن اور مرکزی حکومت کے خلاف صدائے احتجاج بلند کی۔