تاج محل کے پاس فائرنگ کرنے والے بی جے پی لیڈر کو کیا گیا گرفتار، پوچھنے پر کہا ’من کیا تو کر دی فائرنگ‘

تاج محل کے مغربی دروازہ واقع پارکنگ کے پاس ’یلو زون بیریئر‘ کے قریب گزشتہ پیر کو یکے بعد دیگرے 3 فائرنگ ہوئی تھی۔ اس واقعہ کو انجام دینے والے ملزم اعظم گڑھ سے تعلق رکھنے والے بی جے پی لیڈر پنکج کمار سنگھ کو پولیس نے گرفتار کر کے جیل بھیج دیا ہے۔ پنکج کے بارے میں بتایا جاتا ہے کہ وہ ایل آئی سی ایجنٹ بھی ہے۔ وہ فائرنگ کرنے کے بعد پولیس کو چکما دے کر فرار ہو گیا تھا۔ تب سے ہی ملزم کی تلاش شد و مد سے کی جا رہی تھی۔

پنکج کو لکھنؤ پولیس نے گرفتار کر آگرہ پولیس کے حوالے کر دیا ہے۔ پولیس نے ملزم کے پاس سے لائسنسی ریوالور اور 3 کارتوس کا کھوکھا بھی برآمد کیا ہے۔ پوچھ تاچھ کے دوران ملزم نے ایسا جواب دیا، جو حیران کرنے والا ہے۔ اس نے کہا کہ اس کا من کیا، اس لیے فائرنگ کی تھی۔

موصولہ اطلاع کے ملزم پنکج کمار سنگھ تاج محل کے مغربی دروازے پر پیر کی صبح 9.15 بجے آرٹیگا کار سے پہنچے تھے۔ اعظم گڑھ کے بلرام پور باشندہ پنکج نے خود کو حکومت ہند کا افسر بتا کر تاج محل کے دروازے تک گاڑی لے جانے کی بات کی، لیکن پولیس نے انھیں وہاں سے لوٹا دیا۔ اس کے بعد پنکج نے اپنے لائسنسی ریوالور سے 3 ہوائی فائرنگ کی، جس سے علاقے میں سنسنی پھیل گئی۔ اس کے بعد سے ہی پولیس ملزم کی تلاش کر رہی تھی۔

بتایا جاتا ہے کہ ملزم پنکج پولیس کو چکما دے کر دوسری کار پر وہاں سے نکل گیا تھا۔ انتظامیہ کی طرف سے سٹی ڈی ایس پی سونم کمار نے بتایا کہ اس معاملے میں تاج کی سیکورٹی میں تعینات سَب انسپکٹر راجن سنگھ کی طرف سے ہوائی فائرنگ اور گالی گلوج سے متعلق دفعہ میں نامعلوم اشخاص کے خلاف مقدمہ درج کرایا گیا ہے۔ اس واقعہ مین پنکج سنگھ کا نام سب سے اوپر ہے۔ پیر کی شب کو ہی لکھنؤ سے گرفتار کرنے کے بعد پنکج سے پوچھ تاچھ کی گئی۔ اس نے فائرنگ کی کوئی واضح وجہ نہیں بتائی۔ اس نے بس اتنا کہا کہ ’’من کیا تو کر دیا۔‘‘

بہرحال، میڈیکل کرانے کے بعد پولیس نے ملزم کو اسپیشل سی جے ایم کورٹ میں پیش کیا۔ یہاں سے اسے جیل بھیج دیا گیا۔ ٹیکسی ڈرائیور نندلال کو بھی ملزم بنایا گیا ہے۔ پنکج سنگھ نے فائرنگ کی تھی، اس کے باوجود ڈرائیور نے پولیس کو اطلاع نہیں دی۔ اس عمل کو ملزم کی مدد تصور کیا گیا ہے۔ ڈرائیور ملزم کو ایسی جگہ چھوڑ کر آیا، جہاں سے وہ آسانی سے فرار ہو سکے۔ ملزم کی مدد کرنے اور پولیس سے بدتمیزی کے لیے نندلال کے خلاف کارروائی کی گئی ہے۔