راہل گاندھی کل پہنچیں گے کوٹہ، طلبہ کی آواز کو قومی تحریک میں بدلنے کی تیاری

نئی دہلی: لوک سبھا میں قائد حزب اختلاف اور کانگریس کے سینئر لیڈر راہل گاندھی کل یعنی 17 جون کو حضرت نظام الدین سے جن شتابدی ایکسپریس کے ذریعے راجستھان کے شہر کوٹہ پہنچیں گے جہاں وہ نیٹ اور دیگر مسابقتی امتحانات کی تیاری کرنے والے طلبہ سے براہ راست گفتگو کریں گے۔

کانگریس اس دورے کو نوجوانوں کے مسائل، امتحانی بدعنوانیوں اور مسلسل سامنے آنے والے پرچہ افشا ہونے کے واقعات کے خلاف ایک اہم قومی مہم کا نقطۂ آغاز قرار دے رہی ہے۔ پارٹی کے مطابق راہل گاندھی نے دانستہ طور پر روایتی سیاسی طرز عمل اور خصوصی پروٹوکول سے گریز کرتے ہوئے عام مسافروں کی طرح ریل کے ذریعے سفر کا انتخاب کیا ہے تاکہ نوجوانوں کو یہ پیغام دیا جا سکے کہ ان کے مسائل ملک کی سیاست کے مرکز میں ہیں۔