دو تہائی اکثریت کے لیے اپوزیشن میں توڑ پھوڑ، امت شاہ پر کانگریس کا حملہ

جے رام رمیش نے سوشل میڈیا پلیٹ فارم ایکس پر اپنے بیان میں کہا کہ ماضی میں کسی بھی سیاسی رہنما نے لوک سبھا میں اپنی جماعت کے لیے دو تہائی اکثریت حاصل کرنے کی ایسی مہم نہیں چلائی جیسی اس وقت امیت شاہ پارلیمنٹ کے مانسون اجلاس سے قبل چلا رہے ہیں۔ ان کا کہنا تھا کہ وزیر داخلہ شدید بے چینی کے ساتھ مختلف سیاسی جماعتوں کے ارکان کو اپنی طرف لانے کی کوشش کر رہے ہیں۔

انہوں نے دعویٰ کیا کہ 17 اپریل 2026 کو قومی جمہوری اتحاد کو اس وقت بڑی سیاسی ناکامی کا سامنا کرنا پڑا تھا جب وہ حلقہ بندی سے متعلق آئینی ترمیمی بل کی منظوری کے لیے ضروری دو تہائی اکثریت حاصل نہ کر سکا۔ جے رام رمیش کے مطابق اس شکست کے بعد امیت شاہ اپوزیشن جماعتوں کو تقسیم کرنے اور جمہوری اداروں کو کمزور کرنے میں مصروف ہیں۔ انہوں نے کہا کہ کانگریس اور دیگر اپوزیشن جماعتیں اس صورتحال کے خلاف اپنی سیاسی جدوجہد جاری رکھیں گی اور ایسے عزائم کامیاب نہیں ہونے دیے جائیں گے۔