بنگلہ دیش کا ایک بھینسا اپنے نام اور ہیئر اسٹائل کی وجہ سے ان دنوں سوشل میڈیا پر کافی وائرل ہو رہا ہے۔ لوگ اس کا موازنہ امریکی صدر ڈونالڈ ٹرمپ کے لُک سے کر رہے ہیں۔ بنگلہ دیش میں بقرعید کی تیاریاں زوروں پر ہیں، ایسے میں اس بھینسے کی قربانی دی جانی ہے۔ تقریباً 1500 پاؤنڈ وزنی اس بھینسے کو دیکھنے کے لیے بنگلہ دیش کے نارائن گنج علاقے میں دور دور سے لوگ پہنچ رہے ہیں۔ یہ بھینسا ضیاء الدین مِردھا نام کے کسان فارم میں رہتا ہے جو ڈھاکہ کے پاس واقع ہے۔
بھینسے کے مالک ضیاء الدین مردھا نے بتایا کہ سنہرے اور آگے کی جانب جھکے بالوں کی وجہ سے ان کے بھائی نے مذاق میں اس کا نام ’ڈونالڈ ٹرمپ‘ رکھ دیا تھا۔ دھیرے دھیرے یہ نام اس قدر مشہور ہو گیا کہ لوگ خاص طور سے اسے دیکھنے آنے لگے۔ ساتھ ہی انہوں نے بتایا کہ ایک بار 5 دوستوں کا ایک گروپ فارم پر آیا تھا۔ انہوں نے کہا کہ بھینسے کی شکل اور ہیئر اسٹائل بالکل ڈونالڈ ٹرمپ جیسی لگتی ہے۔ اس کے بعد سوشل میڈیا پر اس کی تصاویر اور ویڈیو تیزی سے وائرل ہو گئی۔ انہوں نے مذاقیہ انداز میں کہا کہ میرا بھتیجہ صرف ’ڈونالڈ ٹرمپ‘ کو دیکھنے کے لیے ایک گھنٹے کشتی کا سفر کر کے یہاں آیا تھا۔
دوسری جانب ایران نے سوشل میڈیا پلیٹ فارم ’ایکس‘ پر بنگلہ دیش کے اس وائرل ’البینو بھینس‘ کو لے کر طنز کسا ہے۔ ’ایران اِن رشیا‘ اکاؤنٹ نے پوسٹ میں لکھا کہ ’’بے چارہ! ڈونالڈ ٹرمپ سے موازنہ ہونے کے بعد بنگلہ دیشی بھینسہ پریشان ہو گیا۔‘‘ بھینسے کے مالک ضیاء الدین نے بتایا کہ گزشتہ ایک سال سے وہ خود اس کی دیکھ بھال کر رہے ہیں اور اس سے ان کا خاص لگاؤ ہو گیا ہے۔ ساتھ ہی انہوں نے کہا کہ میں ’ڈونالڈ ٹرمپ‘ کی کمی محسوس کروں گا، لیکن قربانی ہی عید الاضحیٰ کا اصل جذبہ ہے۔
رپورٹس کے مطابق یہ بھینسا پہلے ہی فروخت ہو چکا ہے۔ اس کی قیمت 550 ٹکا فی کلو (لائیو ویٹ) طے کی گئی تھی۔ اس بھینسے کی مجموعی قیمت تقریباً 3.5 سے 3.85 لاکھ ٹکا بتائی جا رہی ہے، جو ہندوستانی روپے میں تقریباً 2.5 سے 3 لاکھ روپے کے برابر ہے۔ بتایا گیا ہے کہ اسے ڈھاکہ کے جنجرا (رسول پور) علاقے کے محمد شورن نے خریدا ہے۔ فارم مالک ضیاء الدین کے مطابق بھینسے کو خریدار تک پہنچا بھی دیا گیا ہے۔
دلچسپ بات یہ ہے کہ اس فارم میں صرف ’ڈونالڈ ٹرمپ‘ ہی نہیں بلکہ کئی دیگر جانور بھی اپنے انوکھے ناموں کی وجہ سے سرخیوں میں ہیں۔ یہاں ایک بیل کا نام ’طوفان‘ رکھا گیا ہے، جبکہ انتہائی بھاری بھرکم جانور کو ’فیٹ بوائے‘ کہا جاتا ہے۔ جبکہ ایک پرسکون مزاج والے جانور کا نام ’سویٹ بوائے‘ ہے۔ فارم میں ایک سنہرے والے بالوں والا بیل بھی ہے جس کا نام برازیل کے فٹبالر ’نیمار‘ رکھا گیا ہے، کیونکہ اس کے بال بھی بلیچ کیے ہوئے سنہرے نظر آتے ہیں۔ جبکہ ایک بھینسے کا نام ’نیتن یاہو‘ بھی رکھا گیا ہے، اس کی وجہ اس کی جارحانہ طبیعت ہے۔ سوشل میڈیا پر اب یہ پورا فارم لوگوں کے درمیان موضوع بحث بنا ہوا ہے اور ’ڈونالڈ ٹرمپ‘ نام کا یہ بھینسا انٹرنیٹ پر خوب وائرل ہو رہا ہے۔
