لکھنؤ کے ایک پرائیویٹ اسپتال میں داخل اتر پردیش کانگریس کمیٹی کے صدر اجئے رائے کی حالت میں بہتری ضرور آئی ہے، لیکن فی الحال وہ آئی سی یو میں ہی زیر علاج ہیں۔ ان کے اچانک بیمار پڑنے سے لوک سبھا میں حزب اختلاف کے قائد راہل گاندھی نے فکر مندی ظاہر کی ہے اور جلد از جلد اجے رائے کی صحت یابی کے لیے دعا بھی کی ہے۔
کانگریس رکن پارلیمنٹ راہل گاندھی نے سوشل میڈیا پلیٹ فارم ’ایکس‘ پر اس سلسلے میں ایک پوسٹ جاری کیا ہے، جس میں لکھا ہے کہ ’’اتر پردیش کانگریس کمیٹی کے صدر اجئے رائے کی علالت کی خبر سے فکرمند ہوں۔ ان کی جلد صحت یابی کی دعا کرتا ہوں۔‘‘ ساتھ ہی انھوں نے لکھا ہے کہ ’’امید ہے وہ جلد از جلد صحت مند ہو کر پوری توانائی کے ساتھ دوبارہ عوامی خدمت میں سرگرم ہوں گے۔‘‘
اجئے رائے کی صحت کے بارے میں جانکاری دیتے ہوئے کانگریس جنرل سکریٹری اویناش پانڈے نے کہا کہ ’’اب ان کی طبیعت بہتر اور مستحکم ہے۔ میں ابھی یہاں (لکھنؤ) پہنچا ہوں اور اسپتال جا رہا ہوں۔ خدا کے فضل سے سب کچھ ٹھیک ہے۔‘‘ کانگریس ترجمان سریندر راجپوت نے اس بارے میں جانکاری دیتے ہوئے سوشل میڈیا پر پوسٹ کیا کہ ’’اتر پردیش کانگریس کے صدر اجئے رائے کی طبیعت کل رات اچانک خراب ہو گئی۔ انہیں فوراً لکھنؤ کے میدانتا اسپتال میں داخل کرایا گیا، جہاں ابتدائی جانچ کے بعد انہیں آئی سی یو میں منتقل کر دیا گیا۔ اب ان کی حالت مستحکم اور بہتر ہے۔ اللہ سے دعا ہے کہ اجے بھائی جلد صحت مند ہوں۔‘‘
کانگریس لیڈر سچن پائلٹ نے بھی اجئے رائے کی جلد صحت یابی کی خواہش ظاہر کی ہے۔ انہوں نے ’ایکس‘ پر لکھا ہے کہ ’’اتر پردیش کانگریس کمیٹی کے صدر اجے رائے کی علالت کی خبر ملی ہے۔ میں خدا سے ان کی جلد صحت یابی کی دعا کرتا ہوں۔‘‘ دراصل اجئے رائے کی طبیعت جمعہ کو ایک پروگرام کے دوران بگڑ گئی تھی۔ انھیں اچانک سینے میں درد، بے چینی اور بے ہوشی کی شکایت کے بعد لکھنؤ کے ایک پرائیویٹ اسپتال میں داخل کرایا گیا، جہاں فی الحال وہ ڈاکٹروں کی نگرانی میں ہیں۔
