لوک سبھا میں گورو گوگوئی کا حکومت پر سخت حملہ، خواتین ریزرویشن بل کو حدبندی سے جوڑنے پر سوالات

لوک سبھا میں کانگریس کے رہنما اور نائب قائد حزب اختلاف گورو گوگوئی نے آئین کی 131ویں ترمیم کے مجوزہ بل 2026 پر بحث کے دوران حکومت کو شدید تنقید کا نشانہ بنایا۔ انہوں نے واضح کیا کہ ان کی جماعت خواتین ریزرویشن کی حامی ہے لیکن اس بل کو حدبندی اور مردم شماری کے ساتھ جوڑنے کے طریقہ کار پر انہیں سخت اعتراض ہے۔

گوگوئی نے اپنی تقریر میں کہا کہ حکومت اس معاملے کو تاریخی پیش رفت کے طور پر پیش کر رہی ہے، حالانکہ ماضی میں بھی کئی بار خواتین ریزرویشن کے حوالے سے قوانین لانے کی کوششیں ہو چکی ہیں۔ انہوں نے نشاندہی کی کہ تین سال قبل بھی اسی طرح کے وعدے کیے گئے تھے کہ مردم شماری اور حدبندی کے فوراً بعد خواتین کو ریزرویشن دیا جائے گا، مگر آج حکومت خود اس عمل میں تاخیر کی بات کر رہی ہے۔