دہلی این سی آر سمیت شمالی ہندوستان میں پھر بدلا موسم؛ بارش، آندھی اور ژالہ باری کا الرٹ

دہلی این سی آر میں دو دن کے لیے پیلا الرٹ جاری کیا گیا ہے۔ اس دوران آسمان پر بادل چھائے رہنے کے ساتھ وقفے وقفے سے بارش ہونے کی توقع ہے۔ محکمۂ موسمیات نے خبردار کیا ہے کہ 30 سے 40 کلو میٹر فی گھنٹہ کی رفتار سے تیز ہوائیں چل سکتی ہیں اور شام کے وقت آندھی کے ساتھ بجلی گرنے کا بھی اندیشہ ہے۔ نوئیڈا، غازی آباد اور گروگرام میں بھی اسی نوعیت کے حالات رہنے کی پیش گوئی کی گئی ہے۔

پہاڑی علاقوں میں موسم کی شدت زیادہ رہنے کا امکان ہے۔ اتراکھنڈ اور ہماچل پردیش میں بارش کے ساتھ برفباری اور گرج چمک کی پیش گوئی کی گئی ہے، جبکہ تیز ہواؤں کی رفتار 50 کلو میٹر فی گھنٹہ تک پہنچ سکتی ہے۔ جموں و کشمیر میں بھی 7 سے 10 اپریل کے درمیان بارش اور برفباری کے امکانات ظاہر کیے گئے ہیں، جس سے درجۂ حرارت میں کمی واقع ہو سکتی ہے۔