نئی دہلی: کانگریس کے جنرل سکریٹری جے رام رمیش نے پہلگام حملے کے معاملے پر مودی حکومت کی خارجہ حکمت عملی کو نشانہ بناتے ہوئے کہا ہے کہ اس واقعے کے باوجود پاکستان کو عالمی سطح پر کسی قسم کی سزا نہیں ملی۔ انہوں نے سوشل میڈیا پلیٹ فارم ایکس پر جاری بیان میں امریکہ اور پاکستان کے درمیان بڑھتے روابط کا حوالہ دیتے ہوئے حکومت کی سفارتی کارکردگی پر سوال اٹھایا۔
جے رام رمیش نے لکھا کہ امریکہ اور پاکستان کے درمیان تعلقات بدستور جاری ہیں اور حالیہ دنوں واشنگٹن میں اس کا اظہار بھی دیکھنے کو ملا۔ ان کے مطابق 22 اپریل 2025 کو پہلگام میں ہونے والے دہشت گرد حملے کی سازش کے باوجود پاکستان کو عالمی برادری کی جانب سے کسی طرح کی جوابدہی کا سامنا نہیں کرنا پڑا۔ انہوں نے اسے مودی حکومت کی سفارتی ناکامی قرار دیا اور کہا کہ کسی بھی قسم کی تشہیری مہم اس حقیقت کو نہیں بدل سکتی۔
انہوں نے وزیر اعظم نریندر مودی کو تنقید کا نشانہ بناتے ہوئے انہیں خودساختہ وشوگرو قرار دیا اور کہا کہ وہ اپنے مخففات اور نعروں کے ذریعے دنیا کو گیان دینے میں مصروف ہیں۔ جے رام رمیش کے مطابق مختلف عالمی کمپنیوں کے سربراہان کے ساتھ علامتی انداز میں یکجہتی دکھانا محض سیاسی حکمت عملی کا حصہ ہے، جبکہ زمینی سطح پر ہندوستان کو کوئی ٹھوس سفارتی کامیابی حاصل نہیں ہوئی۔
کانگریس رہنما نے طنزیہ انداز میں مودی طرزِ حکمرانی کو میکسیمم، آپٹکس، ڈیمیجنگ، انڈیا سے تعبیر کرتے ہوئے کہا کہ موجودہ طرزِ حکومت میں دکھاوے کو ترجیح دی جا رہی ہے اور اس کا نقصان ملک کو اٹھانا پڑ رہا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
