بنگلہ دیش میں صحافیوں پر حملے اور گرفتاریاں ناقابلِ قبول، پریس کلب آف انڈیا کی شدید مذمت

بیان میں بنگلہ دیش کے معروف اخبارات پرتھوم آلو اور دی ڈیلی اسٹار کے دفاتر پر پُرتشدد حملوں، توڑ پھوڑ اور آتش زنی کے واقعات کی سخت الفاظ میں مذمت کی گئی۔ پریس کلب آف انڈیا نے ان حملوں کو آزاد صحافت کو دبانے کی کوشش قرار دیتے ہوئے کہا کہ ایسے اقدامات کسی بھی مہذب اور جمہوری معاشرے میں برداشت نہیں کیے جا سکتے۔

پریس کلب آف انڈیا نے ایڈیٹرز کونسل کے صدر اور روزنامہ نیو ایج کے ایڈیٹر، سینئر صحافی نور الکبیر کو ہراساں کیے جانے کے واقعات پر بھی شدید تشویش ظاہر کی۔ بیان کے مطابق صحافیوں کو خوف زدہ کرنے اور خاموش کرانے کے لیے دھمکیوں اور دباؤ کا استعمال نہایت تشویشناک رجحان ہے۔