پارلیمنٹ میں انڈیگو پروازوں کی منسوخی پر ہنگامہ، حکومت سے جواب طلب، ڈی جی سی اے کا فوری قدم

کانگریس کے راجیہ سبھا رکن پرمود تیواری نے کہا کہ انڈیگو کی 500 سے زیادہ پروازیں جمعرات کو منسوخ ہوئیں، جبکہ اس سے پہلے کے دن بھی صورتحال یہی رہی۔ انہوں نے کہا کہ اس قدر بڑی تعداد میں منسوخیاں ’مونوپولی‘ کے نتیجے میں پیدا ہوئی ہیں، اور حکومت کو ایئر لائن سے سختی سے بازپرس کرنی چاہیے۔ تیواری نے وزیر سے پوچھا کہ بحران کب تک ختم ہوگا، کیونکہ کئی اراکینِ پارلیمنٹ کو بھی اپنے علاقوں کی طرف سفر کرنا ہوتا ہے۔

مرکزی وزیر کرن رجیجو نے ایوان کو بتایا کہ انہوں نے اس معاملے پر شہری ہوابازی کے وزیر رام موہن نائیڈو سے بات کی ہے اور جلد ہی تفصیلی معلومات پارلیمنٹ کو فراہم کی جائیں گی۔ انہوں نے اسے عوامی اہمیت کا سنگین معاملہ قرار دیا۔