مودی حکومت نے اراولی پہاڑیوں کے لیے ’ڈیتھ وارنٹ‘ جاری کر دیا: سونیا گاندھی

سونیا گاندھی کے مطابق اراولی سلسلہ، جو گجرات سے شروع ہو کر راجستھان اور ہریانہ تک پھیلا ہے، ہندوستانی جغرافیہ، ماحولیات اور تاریخ میں نہایت اہم مقام رکھتا ہے۔ انہوں نے لکھا کہ یہ پہاڑی سلسلہ کبھی بنجر زمین کے پھیلاؤ کو روکتا تھا، جبکہ راجستھان کے کئی بڑے قلعے اور جنگلات اسی خطے نے پروان چڑھائے۔ لیکن برسوں کی غیر قانونی کان کنی نے ان پہاڑیوں کو شدید نقصان پہنچایا اور اب حکومت کا نیا فیصلہ اس بربادی کو مکمل کرنے کے مترادف ہے۔

انہوں نے نشاندہی کی کہ مرکزی حکومت نے اعلان کیا ہے کہ 100 میٹر سے کم بلندی والے اراولی خطوں پر سخت ماحولیاتی پابندیاں لاگو نہیں ہوں گی۔ وہ لکھتی ہیں کہ یہ فیصلہ غیر قانونی مائننگ مافیا کے لیے کھلا دعوت نامہ ہے کہ وہ اس سلسلے کے 90 فیصد حصے کو بھی تباہ کر دیں۔