دنیا کی ٹاپ 100 کمپنیوں میں ہندوستان کی ایک بھی کمپنی نہیں، اپوزیشن نے معاشی پالیسیوں پر حکومت کو بنایا ہدف تنقید

کانگریس نے اپنے ایک بیان میں کہا کہ دنیا کی ٹاپ 100 کمپنیوں میں اب ہندوستان کی ایک بھی کمپنی شامل نہیں ہے۔ پارٹی کے مطابق ہندوستانی شیئر بازار سے غیر ملکی سرمایہ کاروں کا اعتماد کم ہوا ہے اور بڑے بیرونی سرمایہ کار مسلسل اپنا سرمایہ نکال رہے ہیں۔ کانگریس کا کہنا ہے کہ اگر سرمایہ کاروں کا بھروسہ کم ہوتا رہا تو اس کا اثر روزگار، صنعت اور معاشی سرگرمیوں پر پڑ سکتا ہے۔

پارٹی نے حکومت کی معاشی اور خارجہ پالیسیوں پر بھی سوال اٹھائے۔ کانگریس کے مطابق اگر وقت رہتے ضروری اقدامات کیے جاتے تو معیشت کو موجودہ چیلنجز کا سامنا نہیں کرنا پڑتا۔ پارٹی نے خبردار کیا کہ بے روزگاری میں اضافہ، صنعتوں کی مشکلات اور کاروباری سرگرمیوں میں سستی ملک کے لیے تشویش کا سبب بن سکتی ہے۔