ہماچل پردیش میں بادل پھٹنے سے کئی مقامات پر سیلاب، دو افراد ہلاک، متعدد لاپتہ

بدھ کو ہماچل پردیش کے کانگڑا اور کلّو اضلاع میں بادل پھٹنے کے واقعات کی وجہ سے آنے والے شدید سیلاب میں دو لوگوں کی موت ہو گئی اور 7 سے 10 لوگوں کے لاپتہ ہونے کی اطلاع ہے۔ حکام نے یہ جانکاری دی ہے۔

ہنگامی امدادی ٹیمیں، ضلعی انتظامیہ اور پولیس حکام کانگڑا ضلع کے خانیارا گاؤں میں موقع پر پہنچ گئے، جہاں سے دو لاشیں نکالی گئیں۔ حکام کے مطابق سیلاب سے متاثر ہونے والوں کی مجموعی تعداد کا ابھی تک اندازہ نہیں لگایا جا سکا ہے۔

وزیر اعلیٰ کے دفتر اور کانگڑا کے ڈپٹی کمشنر نے صورتحال کو ‘سنگین اور تیزی سے تباہی کی طرف بڑھتے ہوئے’ قرار دیا ہے۔ بتایا جا رہا ہے کہ علاقے میں ایک پاور پراجیکٹ چل رہا تھا، جہاں زیادہ تر مزدور کام کر رہے تھے، اسی دوران اچانک تیز بارش شروع ہو گئی اور بہت سے لوگ تیز پانی میں بہہ گئے۔

دریں اثنا، بی جے پی کے قومی صدر جے پی نڈا نے اس واقعہ پر غم کا اظہار کیا اور کہا کہ مرکزی اور ریاستی حکومتیں راحت اور بچاؤ کے کاموں میں مکمل تعاون فراہم کر رہی ہیں۔انہوں نے سوشل میڈیا پلیٹ فارم ایکس پر لکھا ہے کہ  ‘ہماچل پردیش میں دھرم شالہ کے قریب خانیارکے مانونی کھڈ میں پانی کے بہاؤ میں اچانک اضافہ ہونے سے کئی کارکنوں کے بہہ جانے کی افسوسناک خبر ملی ہے۔ میں سوگوار خاندانوں سے اپنی گہری تعزیت کا اظہار کرتا ہوں۔ بحران کی اس گھڑی میں بی جے پی کا ہر کارکن دیو بھومی کے شہریوں کی ہر ممکن مدد کے لیے وقف ہے۔’

اس واقعہ سے محض چند گھنٹے قبل منڈی ضلع انتظامیہ نے کلو ضلع کی سینج وادی میں بادل پھٹنے کے واقعہ کے بعد ایلرٹ جاری کیا تھا۔ انتظامیہ نے پنوہ ڈیم سے دریائے بیاس میں پانی چھوڑنے کی وارننگ دی ہے اور مقامی شہریوں اور سیاحوں کو دریائے بیاس کے کناروں سے دور رہنے کا مشورہ دیا ہے۔