ٹرمپ کا ادویات کی قیمتوں میں کٹوتی کا اعلان، ہندوستانی فارما سیکٹر کو نقصان کا خدشہ

واشنگٹن: امریکہ کے صدر ڈونالڈ ٹرمپ نے ادویات کی قیمتوں میں نمایاں کمی کا اعلان کرتے ہوئے کہا ہے کہ اب امریکی شہری دنیا میں دستیاب سب سے کم قیمت سے زیادہ ادائیگی نہیں کریں گے۔ اس فیصلے کو عالمی دواسازی منڈی کے لیے ایک بڑا قدم قرار دیا جا رہا ہے، جس کے اثرات ہندوستان سمیت کئی ممالک کے فارما سیکٹر پر پڑنے کا امکان ہے۔

صدر ٹرمپ نے کہا کہ امریکہ اب ادویات کی قیمتوں کے تعین کے لیے بین الاقوامی سطح پر قیمتوں کے موازنے کے اصول کو اپنائے گا۔ ان کے مطابق، امریکی صارفین کو سب سے پسندیدہ ملک جیسی قیمت دی جائے گی، یعنی وہی کم ترین قیمت جو دنیا کے کسی بھی ترقی یافتہ ملک میں ادا کی جا رہی ہو۔ انہوں نے دعویٰ کیا کہ بعض ادویات کی قیمتوں میں 300 سے 700 فیصد تک کمی ممکن ہے۔