’موجودہ 543 نشستوں پر فوری خواتین ریزرویشن نافذ کیا جائے‘، کانگریس کا مطالبہ، مرکزی حکومت پر تاخیر کا الزام

کانگریس کے رکن پارلیمنٹ دیپیندر ہڈا نے بھی حکومت پر تنقید کرتے ہوئے کہا کہ خواتین کے ساتھ انصاف کے دعوے کرنے والی حکومت کا رویہ ماضی میں مختلف رہا ہے۔ انہوں نے ہریانہ کی خاتون کھلاڑیوں کے احتجاج کا حوالہ دیتے ہوئے کہا کہ انہیں انصاف کے لیے طویل جدوجہد کرنی پڑی۔

اس دوران جے رام رمیش نے کانگریس کی تاریخی خدمات کا ذکر کرتے ہوئے کہا کہ راجیو گاندھی کے وژن کے تحت آئین کی 73ویں اور 74ویں ترمیم کے ذریعے پنچایتی راج اداروں اور بلدیاتی نظام میں خواتین کے لیے ایک تہائی ریزرویشن نافذ کیا گیا، جس کے نتیجے میں آج لاکھوں خواتین ان اداروں میں فعال کردار ادا کر رہی ہیں۔

کانگریس کا مؤقف ہے کہ 2023 میں منظور شدہ خواتین ریزرویشن قانون کو فوری طور پر نافذ کیا جائے اور اسے حد بندی جیسے دیگر معاملات سے مشروط نہ کیا جائے، تاکہ خواتین کو بروقت سیاسی نمائندگی مل سکے۔