نئی دہلی: دہلی کانگریس کے سینئر ترجمان ڈاکٹر نریش کمار نے جمنا ندی میں ’کروز سروس‘ شروع کرنے کے اعلان کے متعلق دہلی حکومت اور وزیر اعلیٰ ریکھا گپتا پر زوردار حملہ بولا ہے۔ انہوں نے کہا کہ آلودگی جیسے سنگین مسائل سے عوام کی توجہ ہٹانے کے لیے مصنوعی بارش کا ڈرامہ کیا گیا تھا، بالکل اسی طرح سے جمنا کی گندگی کو چھپانے کے لیے اب کروز سروس کا نیا تماشہ کھڑا کیا جا رہا ہے۔
ڈاکٹر نریش کمار نے کہا کہ یہ انتہائی بدقسمتی کی بات ہے کہ جس جمنا کا پانی آج بھی نہانے اور چھونے لائق نہیں ہے، جس میں بدبو، جھاگ اور زہریلے کیمیکل صاف طور پر دکھائی دیتے ہیں، اسی ندی میں بی جے پی حکومت سیاحت اور کروز کے خواب دکھا رہی ہے۔ ساتھ ہی انہوں نے کہا کہ یہ جمنا کی صفائی نہیں بلکہ عوام کی آنکھوں میں دھول جھونکنے کی کوشش ہے۔
کانگریس کے سینئر ترجمان نے وزیر سیاحت کپل مشرا کے ذریعہ سونیا وہار سے اگلے ماہ کروز سروس شروع کرنے کے اعلان کا ذکر کرتے ہوئے کہا کہ ’’ایک گھنٹے کا سفر اور 40 مسافروں کی بات کرنا آسان ہے، لیکن وزیر اعلیٰ ریکھا گپتا یہ بتائیں کہ جمنا کو زہریلا ہونے سے بچانے کے لیے اب تک کیا ٹھوس قدم اٹھائے گئے ہیں۔ جمنا کی بدحالی پر وزیر اعلیٰ کی خاموشی ان کی ناکامی کو ظاہر کرتی ہے۔‘‘ ڈاکٹر نریش کمار کے مطابق حالیہ رپورٹ اور میڈیا میں شائع خبروں کے مطابق گزشتہ ماہ کے مقابلہ میں رواں ماہ جمنا کا پانی مزید آلودہ پایا گیا ہے۔ لیکن حکومت ان سچائیوں پر جواب دینے کے بجائے ایونٹ مینجمنٹ، افتتاح اور تشہیر میں مصروف ہے۔
ڈاکٹر نریش نے سوال اٹھایا کہ جب کروڑوں روپے خرچ کرنے کے باوجود جمنا کی صورتحال بد سے بدتر ہوتی جا رہی ہے تو دہلی حکومت اور وزیر اعلیٰ ریکھا گپتا عوام کو یہ بتائیں کہ اب تک جمنا کی صفائی پر کتنا پیسہ خرچ ہوا اور اس کے کیا نتائج نکلے۔ انہوں نے کہا کہ کہ دہلی کے تقریباً ایک کروڑ چالیس لاکھ لوگ مطالبہ کر رہے ہیں کہ سب سے پہلے جمنا کو حقیقی طور پر آلودگی سے پاک کیا جائے۔ انہوں نے زور دے کر کہا کہ حکومت کو ٹھوس، شفاف اور مدت بند منصوبۂ کار کے ساتھ جمنا کی صفائی کرنی چاہیے۔ صرف فوٹو-سیشن، اعلانات اور تشہیر سے نہ تو جمنا صاف ہوگی اور نہ ہی عوام کو گمراہ کیا جا سکے گا۔
نریش کمار کا کہنا ہے کہ یہ وہی حکومت ہے جو آلودگی کو کنٹرول کرنے میں مکمل طور سے ناکام رہی اور بغیر تیاری کے مصنوعی بارش جیسے منصوبے لا کر ’ٹائیں ٹائیں فِس‘ (بری طرح سے ناکام) ہو گئی۔ ساتھ ہی انہوں نے انتباہ کرتے ہوئے کہا کہ اگر وزیر اعلیٰ ریکھا گپتا جمنا کی صفائی کو اولین ترجیح نہیں دی تو کروز سروس بھی اسی مصنوعی بارش کی طرح ناکام ثابت ہوگی اور دہلی کی عوام بی جے پی حکومت کو اس دھوکے کے لیے کبھی معاف نہیں کرے گی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
