مغربی بنگال پولیس کی سی آئی ڈی کے نوٹس پر ترنمول کانگریس کے جنرل سکریٹری اور رکن پارلیمنٹ ابھیشیک بنرجی نے اپنا جواب بھیجا ہے۔ انہوں نے ’سگنیچر مسمیچ‘ کے معاملے میں پوچھ تاچھ کے لیے جنوبی کولکاتہ واقع سی آئی ڈی دفتر میں پیش ہونے کے لیے مزید وقت کا مطالبہ کیا ہے۔ واضح رہے کہ یہ معاملہ تب درج کیا گیا تھا جب ترنمول کے کچھ اراکین اسمبلی نے شکایت کی تھی کہ مغربی بنگال اسمبلی میں جمع کرائے گئے سرکاری دستاویزات پر کئی اراکین اسمبلی کے جعلی دستخط کیے گئے تھے۔
یکم جون کو سی آئی ڈی دفتر میں پیش نہ ہو پانے کے بعد مغربی بنگال کی سابق وزیر اعلیٰ ممتا بنرجی کے بھتیجے ابھیشیک بنرجی کو ریاست کی تحقیقاتی ایجنسی نے ایک نیا نوٹس بھیج کر پیر کو دوپہر تک پیش ہونے کو کہا تھا۔ ’آئی اے این ایس‘ کے مطابق ریاستی پولیس کے ذرائع نے بتایا کہ ہفتہ کو یہ واضح ہو گیا تھا کہ ابھیشیک بنرجی سی آئی ڈی دفتر نہیں آئیں گے، کیونکہ وہ دہلی کے لیے نکل چکے تھے۔ حالانکہ پیر کو انہوں نے سی آئی ڈی کو ایک باضابطہ پیغام بھیج کر پیش ہونے کے لیے مزید وقت کا مطالبہ کیا ہے۔
ریاستی پولیس کے ذرائع نے بتایا کہ ابھیشیک بنرجی نے اپنے پیغام میں سی آئی ڈی کو پیر کے روز دہلی میں اپنی موجودگی کے بارے میں بتایا اور 10 جون کو کلکتہ ہائی کورٹ کی سنگل جج ویکیشن بنچ میں اپنی عرضی پر ہونے والی اہم سماعت کا بھی ذکر کیا۔ اس عرضی میں سی آئی ڈی کے سمن کو چیلنج کیا گیا ہے اور اس معاملے میں گرفتاری سمیت کسی بھی سخت کارروائی سے تحفظ طلب کیا گیا ہے۔
واضح رہے کہ گزشتہ ہفتے جب ابھیشیک بنرجی نے سی آئی ڈی کے سمن کو چیلنج کرنے اور تحفظ کے مطالبے کو لے کر کلکتہ ہائی کورٹ کا رخ کیا تھا، تو انہوں نے معاملے کی جلد سماعت (فاسٹ ٹریک ہیئرنگ) کے لیے بھی عرضی داخل کی تھی۔
Follow us: WhatsApp, Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
